بسم الله الرحمن الرحيم
في السلك

*كلو شئ زاد
*الا الاهداف التي ينهزم بها منتخبنا
*امس نقصت هدف
*عقبال الدولار
*وكيلو اللحمه
*وعقبال رسوم التحسين وتجديد الحكر
*وعقبال الرسوم الدراسيه
*وعقبال الرسوم العلاجيه واسعار الادويه
عقبال كل الرسوم الحكوميه
*عقبال سعر الكهربا واشتراك المويه
*وعقبال لتر البنزين وزيوت المكنه والاسبيرات
*عقبال اسعار الملبوسات والاثاثات
*وعقبال سعر كباية الشاي وكيس العيش
*عقبال رسوم الاشتراك في شركات الهاتف ورسوم خدماتها
*وعقبال نقصان السوء في خدمات تلك الشركات وشبكاتها الضعيفه والطاشه
*عقبال السوء في الخدمه المدنيه ينقص
*وعقبال الفساد الرسمي يتناقص
*وعقبال ينقص الاعتداء علي المال العام
*يبقي السنه الجايه اقل من الدشليار مليار المعتدي عليها في آخر السجلات
*عقبال اعداد الفارين من الوطن  تحت ستار الغربه او الهجره كمان تنقص
*عقبال الوظائف التشريفيه عددها ينقص
*او يتلاشي عديل
*عقبال النقيصه في اي شئ الا عمرنا ده
*عقبال انقيصه في اي شئ الا مساحة وطنا ده
*عقبال خلافاتنا واختلافاتنا الكتيره دي تنقص
*المهم
*المهمه صعبه بالنسبه للمنتخب
*والحرب علي الاهمال مستمره
*من حقنا ان نحارب الاهمال
*لكن ان توجه تلك الحرب لاسامه عطا المنان
*فهذه تصبح حرب موجهه ذات اجنده
*اين مجدي ؟؟؟
*ولماذا صمت الاعلام عن مجدي ؟؟؟
*اليس مجدي هو الاتحاد ؟؟؟
*ولكن الجماعه نجحوا في ابعاد مجدي عن الاذهان
*وشالوهوا بره الصوره
*وركزوا علي اسامه
*لانهم يريدون حتي الغفير ان يكون موالي لهم
*فالمشكله ليست في لجنة المنتخب بقدر ماهي في اتحاد يقود بتحيز وتهور
*اصحوا يا شفوت شويه
*المهم
*نتمني ان نصل لخارطة طريق يقودنا للعبور الي منصات التتويج
*الموضوع داير دراسات وداير قناعات واهتمامات حكوميه
*سامعاني يا امنا الحكومه ؟(كما يحب ان يناديها استاذنا جبره )
*ولا بتسمعي الدايره تسمعيهو
*وبتطنشي المادايره تسمعيهو
*البلد دي فيها مراكز لتطوير السمع
*لو اضانك تقيله  يا امنا الحكومه بنوديك وعلي حسابنا
*سامعاني يا الحكومه !!
*وزي ماقال الشاعر لحكومة بلده
*الشاعر ده ما معنا هنا
*هناك في بلدو
*بدري الكلام ده
*بلدو بهناك للواق الواق
*قال الشاعر لحكومة بلدو
*حكومه غشيتينا حكومه جهجهتينا
*حكومه ضغطتينا حكومه اهملتينا
*حكومه واعددتينا ولما قشرنا وجينا
*حكومه شريتينا
*طويله القصيده
*ماعلينا
*المهم
*طبعا جاهز الدهب لو شعر بوجود دهب بكورك
*والجماعه البمشوا للدهب مرات بتمقلبوا
*يشتروا الجهاز ويمشوا
*سنه ما يكورك
*يفتكروا الحكايه دي من حظهم النحس
*لكن السبب الحقيقي بكون الجهاز كعب
*عشان الناس ماتدخل في مقلب زي ده
*اول من اشتريت الجهاز في الخرطوم
*تمشي تعمل تست
*تجي جمب استاد المريخ
*لو كورك جهاز تمام
*لانو الميداليات الذهبيه الجويه والكاسات
*بتخلي الجهاز يعرف هنا في دهب
*يقوم يكورك وينطط ويفرح كمان
*لكن في بعض الاجهزه بتكورك ساي
*عشان تتأكد انو الجهاز المعاك ما بكورك ساي
*اول من يكورك ليك جمب استاد المريخ
*تمشي بيهو جمب استاد الهلال
*لو الجهاز اصلي وسمح
*مابكورك طبعا
*ميداليات ذهبيه جويه جوه هنا مافي
*المكورك ليها  شنو
*يكورك يلم الناس ساي للفضيحه !
*يجيب الكلام لي روحو يقولوا جهاز دهب  بكورك للصفر !
*الجهاز الاصلي ما بعملها
*جمب استاد الهلال بتبكم
*بغم ما بقولها
*يقولها علي شنو ولي شنو ؟؟
*علي الصفر !!!!
*روشا جمب استاد الهلال بسكت
*بسكت خجلان
*جهاز الدهب يكوروك ؟؟
*مابكورك
*الا يكون جهاز صيني داقس وبسمع كلام الزوبعه بتاعت ناس فطومه
*لكن الجهاز الجيد
*بخت يدو في خشمو جمب استاد الهلال
*ويقول هده خشمي قفلتو بي يدي
*ايها الناس
*امجاد لسه جمب جاد
*وحاتفضل كده وان طال الصفر
*ايها الناس
*الهلال البلبسوا العريس في الجرتق صفر
*حكاية الصفر دي شنو مع الهلال يا روشا ؟؟
*ولا اخير اسأل عصمت سيد الشعار
*باقي روشا ماعندو دخل بالهلال
*الهلال شعار عصمت
*وعصمت سيد الشعار
*وجهاز الدهب في الصفر مابكورك
*عشان كده كل رؤساء الله اول ما يستلموا
*الواحد فيهم يقول ليك حا ابدأ من الصفر
*مابلقي حاجه يبدها منها
*بلقي الصفر
*عشان كده بقول ببدأ من الصفر
*المرحوم الطيب عبداله طيب الله ثراه
*بدأ من الصفر
*والكاردينال اطال الله عمره
*الليله بدأ من الصفر
*صدقوني
*باسل هيثم طارق حماده
*ده رئيس الهلال سنة الفين واربعه وتسعين
*برضو حايبدأ من الصفر
*صفر مزمن
*ايها الناس
*اليوم حفلنا الكبير
*ناس لجنة استقطاب الموارد الماليه عاملين الحفله
*في الاستاد وبي عقد الجلاد
*وانصاف مدني
*وصباح
*وللصباح
*ربه من امها
*كتمه زي الكتمه
*ومن غيرنا يهدي لهذا الشعب فرصة ان يبتهج وينكتم !!!
*نص يبتهج ونص ينكتم
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*فرحنا لمن حفزتنا واتبرعت لينا
*لكن الحكاية طالت علينا
*كلم عادل القروش دي يسلمها لينا
سلك كهربا
ننساك كيف والزول يتبرع لينا ويقشر بينا وما يدفع لينا
والي لقاء
سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
///////