تحل علينا يوم غد الجمعة الموافق الثامن عشر من فبراير2011م الذكرى الثانية لرحيل مبدعنا العالمى الروائي الطيب صالح. وددت إعادة نشر هذه الخواطر التى صغتها بعد يوم واحد من رحيله الفاجع سائلا المولى عز و جل أن يرحمه و يحسن إليه و يسكنه فسيح جناته مع الصديقين و الشهداء و حسن أولائك رفيقا.كما أرجو من الجميع الترحم عليه و قراءة الفاتحة على روحه الطاهرة.
"كلمات فى رثاء رجل الكلمة، فقيد مشيخة كرمكول، عمودية الدبة، مركز مروى، السودان ... و الأدب و الفن بصورة عامة داخل و خارج أرض الوطن ... المغفور له بإذن الله تعالى الأستاذ الكبير المرحوم الطيب صالح."
أحزان بت مجدوب

الطيب صالح
 ولدا فالح
من يوم ما تبا
وليدا صالح
...
زولا مفضال ... مستور الحال
ما بيعرف قولت داكا محال
مهما اتغرب و مهما  جال
تلقى قليبو مع التربال
...
ترابلة بلدو ...
تحت الدومة اتلمو وقعدو
فيهن يونس ود الريس
وداك مريود الديمه مقيس
و داكا الزين زول الله مهيص
...
بت مجدوب ديك حالا براها
مو فهمانى الخبر الجاها
قالو الطيب ... نان مو طيب
قامت وقعدت ... قامت وقعدت
سرخت نان بالصوت العالى
مالو آناس الراجل الطيب ؟!
....
شان ود صالح قلبو حنين
متحمل آلام الساقى بقالو سنين
شان هى نشافا
نشف قلبو و زادو أنين
....
يسأل نفسو ... وين الترباله ؟!
وين يا رب ... وين الرجاله؟!
وين يارب ... وين الصالحين؟!
وين الفقرا ... و ناس الدين ؟!
...
جاهو الرد من بت مجدوب
شوف آ الطيب ... ناسك ديل
ماهن عايشين !!
و الزين داك القلبو حنين
جايى يكورك
ديل عايشين ... زى الميتين !!
...
فيهن ناسا مرضانين
وفيهن ناسا تجار دين
و فيهن ناس كيفن زاهدين
و فيهن ناسا مو قايلين
يجيهن يوم زى يوم الدين
يوما ينشف فيهو الطين !!
...
و حوضنا الكان دايما رويان
ناشف تب
لا فى مطيره
و لا باجور
حتى النيل
الديمه دميرى
يوم الليلى صبح عطشان !!
...
و الزين داك  زى الضهبان
يحفر و ينقح فى الحيضان
مو قايل
ود حمد صالح بقالو سنين
فى حوش العمدة هناك مرضان !!
...
وناس الحلى اتلمو صباح
بى فقراهن و الصلاح
سمو اسم الله وندهو رسولو
يغتى الطيب من كل شر
لامن صادى يجيهن راجع
عاد يوم داك يوم الأفراح
...
و كل الحلى بتسأل ... و تسأل
كيفن عاد ود حمد صالح
ياكلو الحوت فى بحرا مالح ؟؟!!
و ناس الزين ...
و ناس مريود ...
ود الريس ...
و بت مجدوب...
متلمين فى ضل الدومه
راجين جية الولد الفالح !!
...
الكل قام واقف لاحيلو
سمو اسم الله و ندهو رسولو
قالو هناك لازم نمشيلو
ولدا مو "مقطوع الطارى"
كل خلق الله أهلن هيلو
...
ود الريس قايد القايدى
و داك مريود جاهن من غادى
و داكا الزين ... جايى يخب
تلب فوق حيشان العمده
أول مره يجيهن صادى
...
و بت مجدوب متبلمى تب
عيونا بكن ...
دموعا جرن ...
على كليمى طلعت خافتى
قالت ديل ياهن اولادى
...
بت مجدوب سرخت فى اللمه
ندهت الله يكشف الغمه
يجيب الطيب ليهن راجع
يتحكر فى قلب الأمه
...
بت مجدوب قالت حرم
عليها نزر لابد من دم
يجيب الطيب من وين ...  وين
فشان وسط اهلو يجر النم
فشان قرقير ود حمد صالح
يفرج الكربه يشيل الهم
...
و بدل الطيب جاهن صايح
يبكى يصيح فى زولا رايح
يبكى يكورك بى طول حسو
يا ناس هوى ...
ناس كرمكول ..
ناس الدبه ...
ناس مروى ...
ناس كريمى ...
يا ناس هوى ...
يا ناس من جم ...
أبكو معاى ود حمد صالح
قالو غرق فى بلدا باردى
بلدا فوق ... فوق بحر المالح
...
مات فى بلدا كيفن باردى
و طيرا عجم ...
بلدا ما فيها خلوق تتلم
لا فيها دليب لا فيها نحاس
ما فيها العرضه و ناس حرم
لا فيها بطان يسيل لو الدم !!
...
بت مجدوب يوم نطقت قالت
عاد الطيب ما بتعوض
كلاما كتر ...
و حديسا كتر ...
و ناس الحلى دموعن سالت
...
حريم الحلى اتلملمو جن
يوم شافو الجنازى بكن
بت مجدوب دموعا جرن
و كل زول فى بكانو حرن
كل زول لى صويحبو قلد
و قال ...  الليلى اتبشتن
...
قامو الفقرا قالو آ ... خوانا
داك قدرا من ربنا جانا
أسألو الله خالق الكون
و الصلاح يقيفو معانا
و روحو الطاهرى يوم الحق
فى الفردوس تعيش فى جنانا


الخميس 19/2/2009


Ibrahim Kursany [عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.]