عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.


رنين : يا حبوبة أيامكم كان الرئيس السوداني منو ؟
حبوبة رانيا : والله قرونا ليهم في التاريخ أزهري وعبود ونميري وعمر البشير وقالوا تاني ناس بكري وخالي عبد الصادق وبعدهم الروساء خالد وأيمن وحسام والرئيسة الحالية سميرة فتحي , متعلمة وراقية.

رنين: طيب أحسن رءيس كان منو ؟
رانيا : الحاكم العام الانجليزي زي ما قال جدي اسماعيل زمان ايام الإنجليز كان كل شيء مجانا ، التعليم ، العلاج ، النضافة وقال الخرطوم دي كانت ترقش زي المراية : لا نفايات. ولا ضبان ، ولا باعوض ولا جبايات ....ولا شحادين .

رنين : يا حبوبة انا سألتك أحسن رءيس بعد الإنجليز ؟ وان سمعتك مرات كتيرة بعد الصلاة تدعي لعمر وللزبير ولعلي ، إنتي قاصدة الرئيس الزمان داك عمر البشير؟

رانيا : نوت ات آوول not at all ياحشاي انا قاصدا الصحابة عمر بن الخطاب والزبير بن العوام وعلي الكرار كرم الله وجهه .

رنين : طيب منو ريس الجمهورية الان ؟

حبوبة رانيا : الرئيسة الشابة تاليا هيثم خريجة جامعة كيمبردج وعندها دكتوراه في علوم الفلك والفضاء من جامعة هارفارد الامريكية.

رنين : والرئيس القبلها منو ؟

رانيا : برضها بت شابه متعلمه عمرها خمسة وتلاتين سنة اسمها سميرة فتحي . قالت عايزة تترشح للرئاسة تاني بعد دورتها الأولي ( ٤ سنوات) قالوا ليها وين تاني ياحلوة ...الدستور لا بسمح ولا بتعدل زي زمان بمرسوم جمهوري او أغلبية ميكانيكية بتاعة الحزب الحاكم . أربعة سنة أنف أنف enough is enough وطبعا يا رنين دستور ٢٠٥٠ دا حل كل الأحزاب القديمة ، الأحزاب الاسلاموية والطائفية والقبلية والشيوعية. ....والنطيحة والمتردية وأحزاب الفكة وأحزاب الحزب الواحد للرجل الواحد: يعني one man one party . الله يرحم قادة أحزابنا التاريخية وقادة انقلابتنا العسكرية و روءساء جمهورياتنا الأولي والتانية ويعفو عنهم ويسامحهم......والشاعر قال يا رنين :
.نبكي علي الدنياوما من معشر
جمعتهم فلم يتفرقوا
أين الأكاسرة الجبابرة الأولي
كنوزا الكنوز فما بقين ولا بقوا
رنين : أمين يا رب ارحمهم وسامحهم ،

رانيا : السودان الان في عصر الجمهورية التالتة الخالية من الاستبداد والكساد والفساد ......

ودستورنا الحالي سمح بتكوين تلاتة احزاب فقط: حزب المرأة والبيئة ورءسته رءيسة الجمهورية الحالية تاليا هيثم ، وشعار الحزب: الماء والخضرة والوجه الحسن . والحزب التاني _ حزب المعارضة- الشباب الديمقراطي وشعارو لا بديل للديمقراطية الا الديمقراطية. اما الحزب التالت اسمو :
حزب االمعرفة والتكنولوجيا وشعارو الكومبيوتر والقلم يزيل البلم . وسوف يحتفل الأسبوع القادم بالذكري العشرين لأول انتخابات نزيه خالية من التزوير ومن الأساليب الفاسدة في ظل دستور ٢٠٥٠.

رنين : طيب كيف اقتصادنا بقي ١٠٠٪‏ تمام التمام وزيرو بفرتي _Zero poverty ، يعني نسبة الفقر صفر ؟ إنتي كنتي قبل التقاعد مديرة أكاديمية المعيلق بالجزيرة لدراسات الاقتصاد والتنمية وبروفيسور زائر في كلية الاقتصاد بجامعة لندن.......مش ياحبوبة ؟

رانيا : السودان الان يا ولدي اكبر منتج ومصدر للطاقة الشمسية solar energy والطاقة الحيوية Bio_enrgy المستخرجة من مولاس قصب السكر وقصب العنكوليب بعد ما نضب النفط وانتهي قبل أربعين سنة . وعندنا في ولاية حلايب اكبر محطة في العالم لتوليد الطاقة الشمسية تمتد منها خطوط توزيع لعدد من دول الشرق الأوسط والاتحاد الاروبي. وكمان عملوا السنة البعدها محطة غاز huge يا رنين في عين فرح في شمال دار فور لإنتاج وتصدير الغاز المسال liquified gas لدول شمال وغرب افريقيا وباسعار تفضيلية وفقا لاتفاقية التجارة الافريقية الجديدة لعام ٢٠٤٢.
وبالمناسبة بلغ عايد صادرات السودان للعام المالي ٢٠٧٠/ ٢٠٧١ من الطاقة الشمسية والغاز واللحوم والزيوت النباتية والقمح ٢٠ تريليون جنيه سوداني( تعادل ٣٠ ترليون دولار أمريكي )
والسودان حيستضيف السنة الجاية قمة السبعة الكبار الاقتصادية لأفريقيا : السودان ، اثيوبيا ، غانا، جنوب افريقيا ، موزمبيق ، نيجيريا ومصر. وسوف يعلن السودان في ختام هذه القمة تكوين الوكالة السودانية للعون التنموي في افريقيا .Sudan Agency for Development in Africa(سادا)
لكن نسيت يا رنين أقول ليك ان السودان الان عضو هام وفاعل في منظمة انتاج وتصدير الطاقة الشمسية SEPEC التي حلت محل الاوبك منتهية الصلاحية بعد نضوب النفط . وسوف تعقد " الاسبك" الأسبوع القادم اجتماعها السنوي في الخرطوم تخاطبه وتشارك فيه الدكتورة رغد مازن ميرغني تاج السر
الأمين العام للأمم المتحدة .

رنين : البلد اتملت مغتربين من السعودية والإمارات والكويت والبحرين وقطر ، ومن ارتريا وشاد وكمان من إيطاليا واليونان.....وبعدين يا حبوبة ؟
رانيا : كلامك صاح مية في المية. لكن نقول شنو: ناس الخليج ديل مابننسي أفضالهم علينا اوونا و شغلونا ، وادونا وضيفونا وجيهونا... ولو بعد داك طردونا ! وانا ذاتي يا رنين مولودة في السعودية ودرست في القصيم مدرسة رقم ١٦٥وجدك اسامة نفسه قرا في مدرسة الأحنف بن قيس في مكه. ( لماذا مدارس البنات زمان في السعودية تحمل ارقام ومدارس الأولاد اسماء ؟! ). وكان لي ناس ارتريا وشاد اصلهم معانا من زمان من القرن الماضي لا ساحو لا فاتو ، سيك سيك معلق فيك.
اما خواجات إيطاليا واليونان الجونا ديل ما اجدادهم عاشوا مع اجدادنا وحبوباتنا من ايام الإنجليز في الألفية الأولي : في الخرطوم وكسلا وبورسودان وفي شندي وكوستي وملكال وفي الفاشر والجنينة والدويم: ناس بنيوتي وماريو وديمتري وكرياكو واستراتي : علمونا البقالات الحديثة والسيوبرماركتات ، واكل الجبنة البيضه والجبنة الكرافت والزيتون والمربة والرغيف التوستو....يا حليلك يا بابا كوستا .
وقالوا نسوانهم وبناتهم كانوا جميلات وسمحات ، بيضة بدون كريمات والشعر اسود وطويل لا سلة لا مكوة وفتحن الصيدليات والكوفيرات وعلمن الموضة والتسريحات.
المثل الانجليزي يا رنين بقول : " A friend indeed is a friend in need" يعني زي مثلنا الصديق ساعة الضيق .
وكان للجنوبيين ما رجعوا لينا تاني سنة ٢٠٤٠ نتيجه للاستفتاء التاني وجو دينكا ونوير وشلك وتبوسا وزاندي وعرسو بناتنا وأولادنا عرسو بناتهم. وكمان سموا عليهم شوارع الخرطوم : شارع القصر سموه شارع جون قرنق ، وشارع الغابه سموه شارع سلفا كير ، وشارع عبيد ختم بقي شارع بونا ملوال، ومدرسة الخرطوم القديمة بقت أبل الير الثانوية وبنات ام درمان الثانوية سموها ثانوية ربيكا

رنين : أوكي يا حبوبة انا قريت في صفحة اخوك جدي اسامة في الفيس بوك رسالة يعتذر ليكي انه مما رحل لودنوباوي في أمدرمان ما جا يسلم عليك ويسال منك في بيتكم في المقرن ؟
رانيا : صاح وانا رديت عليهو في صفحتي وقلت ليهو عذرك معاك و don't worry اسومة بس تعال أفطر معانا في رمضان السنة الجاية . اصلو يا ولدي نحنا بقينا زي الخواجات نشوف بعض من سنة لسنة والناس كلها شغالة ومشغولة وما عندها اكسترا تايم يعني زمن إضافي زي زمان للونسة الفارغة وللقرقرة
والقطيعة والشمارات
رنين : والسنه دي كيف الضحية في العيد....ضحيتو ؟
رانيا : والله لينا سنين وسنين خروفنا يا رنين إلكتروني لا بنشوفو ولا بشوفنا : نشتريهو on line ويضبحوا اون لا ين ويقسموه للمساكين home delivery ويعني بقت الحكاية زي العزاء في الميت إلكتروني : الفاتحة ايميلات وواتساب ومسيجات .

رنين : سوْال اخير يا حبوبة السنة دي حتحتفلي بعيد ميلادك التمانين وين وكيف. ؟
رانيا : اولا انا تمانية وتمانين ما تمانين وحنحتفل انا وجدك بعيد ميلادي في منتجع جبل مرة السياحي وفي فندق Sony قمر وعشره نجوم ، نشرب عصير تفاح وفراولة فريش ونستمع لأغنية الحقيبة الخالدة :

انت بدر السما في علاك
قولي من عيني مين خفاك
وبمناسبة بدر السما دي يا حنين جدك قال حنسافر اجازة أسبوعين علي سطح القمر وحجز لينا انا وهو في سفينة الفضاء Peace ( السلام ) سفرية رقم P405. وحنكون هناك في حالة انعدام الوزن لأول مرة في حياتي !!
حنين : هابي بيرث ديي تو يو حبوووووووووبه !
حسن عابدين
باحث في تاريخ المستقبل