أرسل لنا المحامي (شخص) نكتة بت ستين كلب فقمنا بإدخالها في ورشة ود الدابي لسمكرة النكات فطلعت بالشكل التالي: كان في راجل شايقي قضى حياتو كلها شغال زي المكنة، الراجل دا كان موفر قروشو كلها لأنو كان بخيل وجلدة وجبار جنس جبر.. الشايقي مرض مرض الموت وقبال يموت قال الشايقي لي مرتو الشايقية : شوفي يا مرا انا لمن أموت ، عايزك تشيلي كل قروشي وتختيها معاي في الكفن بتاعي عشان انا عايز آخد معاي قروشي كلها للآخرة عشان ما يستفيد منها اي راجل يتزوجك بعدي!!
ردت زوجته عليه وهي تبكي: والله العظيم حاخت قروشك كلها في كفنك إذا انتا اتوفيت بعد عمر طويل ان شاء الله!! توفي الشايقي وقامت زوجته في حضور صديقتها بوضع شيء في كفن زوجها الراحل وبعد داك شالو الجنازة وودوها المقابر ودفنوها!!
صديقة زوجة المرحوم قالت ليها: انا عارفاك نجيضة وما مغفلة وما ممكن تكوني ختيتي كل القروش مع زوجك في قبره مش كده ؟!!
ردت الزوجة: اسمعي ، انتي براك عارفاني أنا متدينة وما ممكن حليفتي تقع واطة ومستحيل ارجع في كلمتي القتها للمرحوم عشان كده أنا ختيت قروشو كلها في كفنو زي ما قال لي والله على ما اقول شهيد!!
فسألتها صديقتها بإستغراب: والله انتي طلعت اكبر هبلة وغلطتي غلطة العمر!! ردت زوجة الراحل العزيز: انا جمعتا القروش كلها وختيتا في حسابي في البنك وكتبتا ليهو شيك بمبلغ القروش كلها وختيتو ليهو في كفنو... خليهو يمشي يصرفو من بنك الآخرة !!!
قال ليك الشيطان الرجيم كان قاعد في ركن الكوشه وبشرب في عصير عنكوليب واول ما سمع مقلب المرا الشايقية شرق وقحا وعطس 35 مرة ثم قال: حسبي الله عليكم يا حريم الشايقية قطعتو عيشي في السودان عديل كده... وبعداك الشيطان دقا لي نفسو خروج نهائي وهرب من السودان ووشو يلعن قفاهو!!!!


عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.