نقول لاخوانا الجنوبيين بعربي جوبا:
انينا شماليين بقوول ليكم: مبروك جدن جدن لى جنوب سودان ولى كلى اكوانا جنوبيين في جنوب وشمال سودان ، مبادرا بتاء سلام من معاردا جنوبيا مسلهه دا ، هاجا كويس جدن جدن ، وترهيب بتاء هاكومة سلفا كير بي مبادرا بتاء سلام بتاع معاردا بردو هاجا كويس جدن جدن ، مرا سوداني هلوه دا ، بقدم نشرة بتاء اكبار في اسكاى نيوز اربي ، جاب اكبار كويس جدن جدن، انينا يشوف سورات جميلا جدن جدن، كبارات بتاء معاردا جنوبيا مسلهه جا في تلفيشن وهو مشا جوبا سان دايرين يوقوفو هرب بتاء جنوب سودان، ودايرين يامولو سلام مع هاكومة بتاء سلفا كير ، كدا كويسا جدن جدن سان بلد بتاء جنوب سودان ، كده كويسا جدن جدن سان شعب بتاء جنوب سودان! تاني انينا شماليين بقوول ليكم: مبروك كتير لى جنوب سودان ولى كلى اكوانا جنوبيين!

ونقول لاخوانا الشماليين بعربي الخرطوم :
اها يا ناس المعارضة السودانية المسلحة وغير المسلحة ، المعارضة الجنوبية المسلحة بقت احسن منكم وقدمت مبادرة سلام بى كل شجاعة ، وزعماء المعارضة الجنوبية المسلحة ذاتم ظهروا في فضائية اسكاي نيوز العربية والمذيعة السودانية في القناة قالت إنهم مشو زارو جوبا وقابلو سلفا كير عشان يوقفو الحرب في جنوب السودان وعشان يحققو السلام لي جنوب السودان ولى شعب جنوب السودان ، انتو مبادرتكم وزيارتكم وينا؟! بعدين يا ناس حكومة المؤتمر الوطني ، ياخي بطلوا الاستهبال بتاعكم دا وخلونا من مبادرة النطة والوثبة دي ، قدمو مبادرة زي الناس وخلو رئيس المبادرة يكون زول محايد ولو مافي زول محايد في السودان استوردوه من بره، ما معقول زول يحاور خصمو ويكون هو ذاتو رئيس للحوار، ياخي حكمتو السودان خمسة وعشرين سنة ولسه ما شبعتو من الحكم! ياخي البلد كلها اتدمرت والشعب جعان شديد وتعبان شديد، يا اخوانا باركوها شوية، وكونو زي الجنوبيين ، بيضوا نياتكم شوية وقدمو مبادرات حقيقية ووقفو الحرب في دارفور وكردفان وجبال النوبة وحققوا السلام للسودان وللشعب السوداني الفضل، قوموا إلى مبادراتكم وسلامكم يرحمكم الله وبطلو اللف والدوران السياسي الما بفيد السودان وما بفيد الشعب السوداني.

فيصل الدابي/المحامي


عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.