...................
ياللّكاتمين الحزن لوعة وجراح
ياتو دمعة بتحمل الأحزان علامة ؟
ياللّشايلين الليالي مع النّجوم من غير صباح
ياتو شمعة تشيل صدى الليل ابتسامة ؟
لمّا الحنين في الدّم يزيد
لمّا الدّرب يمتد بعيد
والأمل يصبح عنيد
تبكي الصّحاري على المطر
تشيل مواسم شوقا حر
حلم وئيد وسراب بحر
......................
دنياي شوق حلم الزّهر
ليك يا ربيعي المنتظر
لا بان صباح وشك قريب
لا شوقي ليك مدّو انحسر
........................
وريني كيف شدر الحراز
بتحدّى كيف فصل الجفاف
ويعيش حلم شوق الضّفاف
ويصبر علي حرب الرّزاذ
كاتم جراح أحزانو سر
.....................
أديني من صبرك قليل
كيف أكون زيك مثيل
شامخ أصارع فى الظّروف
واضحك أمام المستحيل
ومر الأمر
.......................
ما كان بعادك لى خيار 
لا تيه مسار
لا شوق سفر ،
أسألي اللّيل والقمر
لو حتى قلبك لى نكر
مهما الزمن ودربك طويل
أو حتى ريدك لى فتر
سيبيني للحلم الجمبل
أتخيلك شايلاني في رمشك سهر
...........................
كيفن يكون زيك بديل
إلا الزّمن جار وانتصر
جواى كسر إيقاع غناي
بحة وتر،
غنيت عليك والليل طويل
شاركنى فيك نجم السّحر
بعد القمر بكى واعتذر
كانت حروفي عليك دليل
ريدك قدر وشراع سفر
من منافى إلى منافى
فى رحاب عالم خرافى
شايلك معاى لهفة  سفاين
من زمن حلمى المرافئ
شوقي واله لشواطئ
زى عيونك لونا دافئ
إلا ياروح المعاني
ياشرف كلّ القوافى
الجارية فى دمي ولساني
لا لقيتك لا نسيتك
وانتي في احلامي نايمة
ساكنة فى شريانى حايمة
في بحور أحزاني عايمة
خوفي من أقدار زماني
خوفى مانتلاقى تاني
ليك فى اخر كلامي
ليك سلامي واحترامى
مع جميل كلّ الأماني

عوض شيخ إدريس حسن
ولاية اريزونا .امريكا
Awad Hassan [عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.]
//////////////