بسم الله الرحمن الرحيم

في السلك

 

*ايها الناس

*اليوم يوم مبارك

*يوم خصه الله بتميز لا مثيل له

*يوم بجي في السنه مره

*هنيئا لمن صام هذا اليوم استغفارا وتقربا وخشوعا وقناعه

*ونسأل الله ان يتقبل منا ومنكم صالح الاعمال

*ونسأله ان يوفق من فاته صيام هذا اليوم في صيامه العام القادم

*تعالوا نراجع انفسنا

*ونغير السالب فيها

*كي يغير الله ما بنا

*ومابنا لايخفي علي احد

*مابنا اريتو لو بالعدو

*مابنا مابالتاباني

*تعالوا نغير سلوكياتنا لتتفق مع عقيدتنا ومبادئنا واعرافنا وتربيتنا

*الشمار ما سمح

*فهو يقع تحت باب النميمه

*والحسد نتعوذ منه

*من شرحاسد اذا حسد

*والكسل في الشغل بدخلنا تحت باب من اخذ الاجر

*الاهتمام بالعبادات

*تعالوا نغير انفسنا شويه

*حتي ولو بعدنا من تأدية عباداتنا

*دعونا نعود سريعا لدرب التعبد

*ماضروري من اول يوم نبقي شيوخ

*نقوم ونقع الليل كلو

*تعويد ثم تجويد

*تم تميز فننافس بعضنا علي الطاعات

*ايها الناس

*كباري السوق حرام

*السمسار ما يخت كبري في المشتري

*ولا يعمل كبري في البايع

*السعر يكون واضح

*ويحدد حقو بكل وضوح

*فربنا قال لينا لا تأكلوا اموالكم بينكم بالباطل

*واليوم الاكل باطل بس

*الصينيه كلها باطل

*الساندوتشات باطل بالشطه

*وشيش باطل

*وكريسبي باطل بالشيبس

*والعمارات علي اعمدة الباطل تتكئ

*كسوتنا بالباطل

*مليونير فينا تلقاهو عاطل

*مليارات جاتو بالباطل

*ومابتمشي معاهو هناك

*محل الشبر والدبلان

*لما يلفوك بي كرت بتعرف حاجه

*وحتي النساء

*في الشبر داك مافيش يمه ارحميني

*طبعا النساء بلفوهن بي كرتين

*وقعتكن سوده

*ايها الناس

*حقو نقيف مع انفسنا شويه

*حقو ما نقنع

*ربنا غفور رحيم

*بس ما بخلي حق الناس

*وجاء في الحديث القدسي

*وعزتي وجلالي لا اظلمن عبدا لعبد

*حقو نتوب ونطلب العفو من الناس الظلمناهم

*ودي مقدور عليها

*لكن في ناس العفو بالنسبه ليهم مشكله

*لما تمتد ايدك علي حق الشعب

*تلقي الشعب وين عشان يصافيك نفر نفر

*تلقي الشفع الماتو بامراض سوء التغذيه وين لو انت اكلت حقهم فاصابهم سوء التغذيه

*تلقي الناس العانت من سرطانات جابتها ليهم  سلع مخالفه للمواصفات وين عشان يعفوا ليك ؟؟؟

*حتي ناس بيتك لو اهملت فيهم تلقاهم وين لو شتتوا بسبب اهمالك

*اللهم العفو والعافيه

*اللهم ولا تحملنا ما لاطاقة لنا به وارحمنا بعد ان تجود علينا بالعفو يا ارحم الراحمين

*وصل اللهم وسلم علي سيدنا محمد وعلي اله وصحبه وسلم

*اللهم واجعلنا موحدين حقا حتي نستمتع بطمأنينة التوحيد

*فالموحد يوقن بان كل البشر لن يستطيع ان يهز شعره في رأسه الا تنفيذا لارادة الله

*ويوقن بانه لو ماعارف عنوان رزقه فرزقه يعرف عنوانه جيدا

*ويوقن بان من يخاف الله لا يخاف الناس

*ومن يخاف الناس لايخاف الله

*اللهم اجعل خوفنا منك يتملكنا بشدة يا ارحم الراحمين

*ايها الناس

*ايام رائعه تلك التي نعايشها الان

*تعالوا نحي سنة التكبير

*الله اكبرالله اكبر الله اكبر لا اله الا الله

*الله اكبر الله اكبر ولله الحمد

*نحيها ونرددها لتنطلق في الآفاق الرحبه حتي تصل عنان السماء

*الله اكبر كبيرا والحمد الله كثيرا وسبحان الله بكرة واصيلا

*لا اله الا الله

*ايها الناس

*التكبير هو شعار الشفوت في التشجيع

*نثبت به قلوبنا ونهز به قلوب الاعداء

*الاستاد كلو يكبر مع بعض

*القصه منسقه تنسيقا جيدا

*مكبرات الصوت ستقود التكبير من داخل الاستاد

*والشفوت عليهم الترديد

*من القلب

*وياحبذا لو احيينا هذه السنه في الشوارع

*ونحن قادمون نحو القلعه الحمراء

*نكبر الله ونحمد ونساله التوفيق

*اخوتنا الاهله علمت بانهم برضو قرروا التكبير في تشجيعهم

*لكن بس خصمهم برضك مسلم

*التكبير ممكن يثبتهم

*دي مشكلة شنو دي يا اخواني ؟؟؟

*ومريخاب مدني اعدوا العده

*جايين بي بصاتهم

*للتنسيق الاتصال بالشفت عثمان ابو نيران 0123507555

*ايها الناس

*النهائي احلوه جدا

*سنواجه اتحاد الجزائر بدون البلايلي

*نعمه من الله جاتنا

*لبنت يا شفوت

*ماتدوها الطير

*المهم

*عمنا الصادق والد فطومه اختي

*كان طريح الفراش الابيض ولكنه تماثل للشفاء

*حمدالله الف علي السلامه يا فطومه يا اختي

*وعمك الصادق شامي معانا ريحة المطار خلي بالك

*عشان كده خايف عليك شديد

*المهم

*الحله كلها اتملت خرفان

*ناس جايبين الخروف بالاقساط

*جارنا موظف

*قلت ليهو خروفك وينو ؟؟؟

*قال لي لسه ما اشتريت

*قلت ليهو وتشتري ليه الموظفين ديل كلهم ادوهم بالاقساط

*عارف قال لي شنو يا روشا !!!!

*قال لي جني وجن صحيفة الاسياد وخروف الاقساط

*قلت ليهو روشا السنه دي ضابح في مصر اظنو

*جمع تقديم

*المهم

*الحله كلها اتملت خرفان

*باع ما تديك الدرب

*انتوا بمناسبة خرفان دي

*الزملك موش قبل ما يغلب الاهلي طير سموحه بالضربات الترجيحيه ؟؟؟

*اليوم داك تشكيلة سموحه غير

*ادائهم كان غير

*الغيرهم شنو يا ربي ؟؟؟؟

*اللهم اغفر لنا ولوالدينا يا كريم

*المهم

*الشفوت شغالين صاح

*وناس المنوره الكواهله جنوب الجزيره قطاع ود رعيه مستعدين

*واحمد الطيب محمد موسي قال ندرا عليهم الكرامة بتاعت الكاس في المنوره

*اليوم داك ضبح جماعي

*خرفان وتيوس وارانب وقمري

*مستضيفين جميع الشفوت في الشرق الاوسط والعالم العربي

*ايها الناس

*ان تنصروا الله ينصركم

*اها

*نجي لي شمارات والي الخرتوم

*كلو سنه انت ونحنا طيبين يا والينا

*السنه الجايه ان شاء الله الله يحقق امانينا

*انت امانينا قايلها شنو يا والينا ؟؟؟

*اول حاجه لما المطره تجينا

*مانشوف والينا مكفكف بنطلونوا وخايض يورينا

*دايرين المطره تكون اتصرفت قبل تنزل علينا

*ومن امانينا الولاية مجاني تقرينا

*ماصعبه دي يا والينا

*ومن امانينا دايرن عاصمتنا شوية تنضف لينا

*تتشجر وتتبخر وتتسطر وتتحنن ناقشه ايدينا

*ومن امانينا

*الاسعار تثبت لينا يا والينا

*من امانينا الدولار يبطل حقارتو بينا

*وجنيهنا يبطل احراجوا لينا وشويه يحس بينا

*من امانينا الوظيفه تتوفر لينا

*من امانينا المواطن مايفكر يهاجر يخلينا

*والمسئول يخاف الله فينا

*من امانينا يا والينا

*نمسح الدمعه الحزينه

*عشان اطفالنا يوم واحد يشوفوا البسمه في عينينا

*ومن امانينا بلدنا تلمنا في احضانها وتساوينا

*صعبه دي يا والينا ؟؟؟؟

*كان حققتوها لينا الله اكبر يا والينا

*وكان اهملتوها لينا

*الله اكبر ولله الحمد يا والينا

سلك كهربا

ننساك كيف  ولما العيد قرب  وما جبنا خروف الكلب  اتخارج وقال بعملوها ديل خلي بالك

والي لقاء

سلك عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.