بسم الله الرحمن الرحيم

في السلك

 

*اكتب كالعادة قبل لقاء اتحاد العاصمه ووفاق سطيف *لا اميل للقول بان اتحاد العاصمه يمكن ان يتواطأ علي حسابنا *فالاخوه في الجزائر اظنهم اشرف من ذلك بكتير *واذا صدق حدثي في المباراه *اليوم ليس علينا الا ان نترحم علي المليون شهيد *نزور اهلم *اسره اسره *ونشيل معهم الفاتحه *اما باقي المليون شهيد القاعدين في امدرمان *فاظن انهم قد استشهدوا تاني بعد فوز الاتحاد علي الوافق اذا حدث *متضايقين *ولكن اذا لم يحدث فوز الاتحاد علي الوفاق *الليله شهداء الجزائر بالسودان حايستشهدوا ليلا *وبكرة الدفن *حايدفنوهم تاني *وينتهي العزاء بمراسم الدفن *بالمقبره *ايها الناس *لا نحب ان ناكل الا بايدينا *ولكن كان ناس اتحاد الجزائر خصمونا وحنسونا وختوها لينا في خشمنا *ما بناباها *ولنا اجر المضغ والبلع *لكن صدقوني *اتحاد الجزائر يغلب الوفاق *ما يغلب الوفاق *هنا بنغلبوا ان شاء الله *ديديه لازم يضع بصمتو *لازم يجيب قون *دردقها ليه يا بكري *عقربها ليهو *الراجل برضك دردقها ليك يوم العلمه *ايها الناس *ريحة المطار فاحت *وسعادة اللواء النذير ليهو نذر *قال يوم المطار حاينزل في السوق عطر *اسمو ريحة المطار *التعبئه سودانيه ميه الميه *والعطر تركيبه ايطاليه فرنسيه *الديباجه غانيه *والغطاء نيجيري *البخاخ عاجي *واتبخبخي *ايها الناس *ابو الهل ابن عمنا *وبكره امرو بهمنا *لازم نقيف معاهو كلنا *الشغيل ما موقوف *لازم يلعب *وصلاح الجزولي ما كعب *اشراكو ضروري *والكوكي شاطر *بس اقيفوا معاهو *مساوي ما تقيل *لكن فاقد اتير *والبفقد اتير بفقد كتير *والبفقد كتير *وانا ما داير اقول بتغلب كتير *المهم *الشتلات كترت السنه دي *والغريبه السخانه دي بتكتل الشجر الكبار *يعني ده ما وكت شتلات *فشتلوا معركة ايمن وجمال سالم *وشتلوا صفر المريخ الدولي (بدون ادني خجله ) *وشتلوا استقبال الشفوت لي ناس مازيمبي *والسخانه تزيد *والشتلات تموت *ويشتلوا تاني *ايها الناس *العشره الاواخر دائما بتجي فيها المشاكل للهلال *تتذكروا ناساروا ؟؟؟ *تتذكروا فيتا ؟؟؟؟ *تتذكوا السواسيو ؟؟؟ *حقو كردنه يشتكي الكاف لي لوزان *عشان يلغوا ليهو العشره الاواخر *العشره الاواخر في رمضان بتدخل العضم *وفي الهلال بتدخل الشبكه *مكسيم عارف الكلام ده ؟؟؟ *ايها الناس *اتمني ان يكون هذا العمود بين ايديكم والمريخ قد اعلن التأهل *عشان الليله نحضر الكورة بي مزاااااااااج *وغرزه يجرب *جمال سالم رئيسا للنادي *وجمال الوالي راس حربه *بكري المدينه ثيردباك *وكوفي حارس مرمي *ايمن سعيد صانع لعب *وجابسون مساعد مدرب *نجرب زي ما دايرين *يعني حايحصل شنو ؟؟؟؟؟ *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *السخانه الفينا *ما طبيعيه يا والينا *كلو شئ زاد *اوعه تكون تزدتوها لينا *سخانه في الجيب *سخانه في الجو *سخانه في الاجزخانه يا والينا *ياخفضوا سعر العلاج يا والينا *يا السخانه دي خففوها لينا سلك كهربا ننساك كيف والكلب من السخانه صوفو اتحته والي لقاء سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.