بسم الله الرحمن الرحيم

في السلك

*امس طالعتنا الصحف الهلاليه باخبار عن عدم صحة شكوي المريخ *ياناس *باختصار عشان زمننا ضيق *في مطار راجينا *لاتشابه اسماء ولا تشابه بقر ولا اتنين بتشبه اطناشر *لاعب الامل المقصود *هو نفسه لاعب المورده القضارف الموقوف سنه *وايقافه ينتهي في اكتوبر 2015  *يعني لسه موقوف *لانه هو ومعه لاعبان من موردةالقضارف *واحد اسمو الشغيل (سبحان الله ) والتاني اسمو وليد (آمنت بالله ) *قام الحكم ود البابور بطردهم بعد ان وجهوا له الاساءه والسباب *ودون ذلك في تقريره *وعلي ضوئه قام اتحاد القضارف بايقافهم سنه *فالمباراه تتبع لاتحاد القضارف *وهنا يختلف البقر *لان لاعب الشرطه القضارف كان قد تم طرده بمعية اربعه من لاعبي الشرطه القضارف في مباراتهم ضد هلال الساحل بالتاهيلي *والتأهيلي بطولة تتبع للاتحاد العام *يبقي يا روشا قرار ايقاف اللاعب بتاع الامل بكون عند اتحاد القضارف *مابكون عند الاتحاد العام *دي واحده *التانيه اللاعب تم عندما اراد امل عطبره تسجيله *تقدمت ادارة المورده القضارف باستئناف *تم رفضه بالقضارف *ومشي عطبره بي عقوبتو *يعني زي الحولوهو من سجن القضارف لي سجن عطبره *مشي بي عقوبتو *وبعد داك موردة القضارف استرحمت للاعبين الاتنين الباقيين *والاسترحام كان لايشمل اللاعب محور حديثنا *ضف الي ذلك يا روشا *وخلي بالك يا رمضان *وركز علي الحته دي يا خالد عزالدين *وخليك معانا يا عائس *اللاعب المعني ليهو عقوبه اخري *وبرضو وجوبيه *وهي ايقافه تلاته مباريات لانه نال الكرت الاحمر تلاته مرات بالاضافع للاصفر *ودي بتوقفوا تلاته مباريات *وقف كورة في القضارف *وكورة مع الامل *وواصل طوالي *يعني كسر الايقاف في دي برضو *وكسرت الايقاف في دي بتكسر رقاب الحقد رقبه رقبه *زي كسرت الشمبر *دخانكم يا يملي البلد *ونقول للاخ جمال حسن سعيد *تشابه اسمك وجمال حسن سعيد الفنان *لم يوقعنا في خطأ التشابه *برغم انك اتيت في هذا الخصوص بكوميديا قتلتنا ضحكا *فنحن لا تتشابه علينا الاشياء *ولا يتاشبه علينا البقر *البقر في الجزاره بنفرزوا كويس *ولا تتشابه علينا الارقام *فاتنين لاتشبه لدينا اطناشر مهما حصل *وسبعطاشر لاعلاقه لها بسبعه وعشرين اطلاقا *ايها الناس *نقاط الامل اضمن من نقطة الفاء في وسط الصفر الدولي *وقع ليكم ؟؟؟ *ولا تستنوا القرار يوقعها ليكم ؟؟؟؟؟؟ *المهم *يتحدث الناس عن ضربات جزاء للمريخ *وامس اعترف روشا بان للمريخ ضربتا جزاء صحيحتين لم يحتسبهما الحكم *روشا طبعا وقف هنا *ماقدر يقول الضربتين كانن مع بكري المدينه *كمان الصراحه ما للدرجه دي *ولكنه اقر بهما ليقول بان الضربه الاولي كانت ما صحيحه *اخير عماد بتاع الخضار يا روشا *سمعها في الراديو *من المذيع قال ضربة جزاء *عماد قال ما صحيحه *انتوا الزناطير ديل كلهم كده ؟؟؟؟ *ياناس *يا اعلام الهلال *في لاعبين خطورتهم بتجبر المدافعين علي ايقافهم بالضرب *والضرب داخل الخط يعني بلنت *وممكن الكورة يكون فيها الف بلنت *ومثال لذلك في مباراة الارجنتين والبرازيل *رونالدو الخطير الماعندو مهاره *ضربوهوا تلاته مرات ناس الارجنتين داخل الخط *لم يتردد الحكم في احتساب التلاته ضربات تلاته بلنتيات في نفس المباراه *وشاتهم التلاته رونالدو براهو *وغلب بيها الارجنتين وبقي بيها هداف البطوله *يبقي العيب وين لو احتسب الحكم المخالفات مع المهاجم الخطير داخل الخط ضربات جزاء ؟؟؟ *وفي البلد دي اخطر مهاجم *في الوطنيين والاجانب *هو العقرب *يعني ناس كاريكا والجزولي والحاجات دي ما بتتقارن بيهو *ولا الاجانب *اسي عليكم الله اخير بكري ولا كيبي ؟؟ *اخطر بكري ولا جوليام الحمام ؟؟؟ *يبقي اي عرقله لبكري بلنت *رمضان يزعل *روشا يعتزل *محمد عبدالماجد يكتب عن عثمان حسين *يحتجب *عائس يكلمنا عن قوانين السباحه *كردنه يزوغ *الثريا ما تدفع *الهلال يطير *اي عرقله لبكري بلنت *وياريت نمشي المطار بي بلنت مع بكري في الدقيقه الاخيره *عشان تبقي ميته ومطار *ميته لي ناسا كده *ومطار لينا *قلت لي ابليس قال شنو ؟؟؟ *قال ليهو زنطور بنشيل كاس افريقيا متين ؟؟؟ *ابليس بكي *قالوا ليهو بتبكي مالك يا ابليس ؟ *قال ليهم اليوم داك انا ما بحضروا *شفتوا ليكم ابليس بحضر يوم القيامه !!!! *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *كتمت علينا *اول مرة تكتم بدون طاره يا والينا *بقت تكتم بدون طاره وبدون مطره تنزل علينا *لكن ماشفت الالكتروني والعملها فينا *نجي بي قروشنا ونرجع وفي جيوبنا السمينه *وكان رجعنا بيها يا والينا *المره ما بتخليها لينا *ايصال الكتروني للنسوان لازم تعملوا لينا يا والينا *عشان يوقف اليوماتي العلينا *ولما تجي الشبكه يحلها الف حلال يا والينا سلك كهربا ننساك كيف والكلب لما يشوفنا راجين الالكتروني بضحك علينا ,,,مابقولها هو هو لينا *بقي يقولها هي هي هي يا والينا والي لقاء سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.