بسم الله الرحمن الرحيم

في السلك

 *ايها الناس *خسارة عطبره لاتعني الانفضاض عن سامر الزعيم *فكلنا يعلم اننا لعبنا بتشكيله ليست الاساسيه *ولكنا لانعلم لماذا اختار غرزه تلك التشكيله *بالتأكيد له اسبابه المقنعه *ومنها اختيار البدائل المناسبه اذا احتاجها للمعارك الافريقيه *ومنها الوقوف علي مستويات اللاعبين ليعلم من احق بالبقاء ومن يجب ان يرحل *ومنها قد يكون هناك من يحتاج للراحه من الاساسيين *ومن يحتاج للعلاج *قد تتفاقم اصابته اذا اشركه في مباراة عطبره *ومنها من اراد غرزه اراحته من الارهاق *فلا تنسوا ان اولاد الزعيم صاموا في معسكر خارجي *وخاضوا اشرس نزالين بالجزائر *غير المباريات الاعداديه بالجزائر *وعند عودتهم واصلوا في مباريات الممتاز *وكان السفر للفاشر *وبعدها موقعه سطيف الكملت الكيف *ايها الناس *بالتأكيد غرزه ليس بالبليد *وليس بالمقلد الذي يقلد كوكة الهلال *هكذا اطلق عليه الاهله *لان من يسمع ان غرزه يقلد الكوكي بالطبع سيضحك *الكوكي زاتو لو سمعها بضحك *ايها الناس *في تسعه وتمنين *عندما كان رودر يخطط للظفر بمانديلا *وضع الكأس الافريقه هدف اساسي *وضحي باي شئ يتعارض من ذلك الهدف *وفي الاجتماع سأل *كم مره شلتو الدوري ؟؟؟ *قالوا ليهو كتييييييييير *قال ليهم كم مرة شلتو بطولة افريقيه ؟؟؟ *قالوا ليهو ولا مره *الوكت داك المريخ كان زي الزناطير *بطوله افريقيه ماعندو *لكن كان بي سيكافتو *فقال لهم رودر *اذن دعونا نعمل من اجل البطوله الافريقيه *فعمل من اجلها وكانت له *اتتنا منقاده تجرجر ضنبها *اذن *دعوا غرزه يشتغل شغلو *والدوري ملحوق *فالشترة ام رقيصا نط *في الواطه دي مشيها غلط *ومصيرها براها تعتر وتتشنقل *وحتي ولو قادوها الحكام باخطائهم (الغير مقصوده ) من يدها عشان ما تقع *سنقابلها ونوريها شطارتنا بتغلب شتارتها *المهم *الاهله فرحوا لخسارتنا في عطبره *لانهم يحبون لغيرهم النجاح *بفرحوا بفرح الغير *مساكين الفرحه مفارقاهم *ومابقدروا يجيبوها براهم *ودلائل الحزن كتيره *اولها السبعه انفار الدخلوا كورة الميرغني *مريخاب ساس واساس اكتر من الجمهور الدخل كورة الميرغني *لان الجمهور عاقل *وعرف الكضبه *ايها الناس *من الجحور خرجت علينا الجقور والزنطور *ولكن سرعان ما يعودوا الي جحورهم *فسكان الجحور لا يعرفون الحياه في النور *ايها الناس *عمار الشفت حكي لي قصة مضحكه *قال لي زمان عوض بابكر كان بقدم برنامج غنائي *بجيب اغنيه محدده ويستضيف زول يتناول الاغنيه بالنقد والتحليل *مرة جاب اغنيه هابطه *واحد قال لي عمار دي اغنيه يجيبها عوض بابكر ؟؟؟ *عمار ضحك وقال ليهو *جاب الاغنيه دي عشان يوريك عظمة الغناء السمح *فغرزه امس ياناس يمكن داير يورينا عظمة الغناء السمح *ونحن في انتظار ذلك الغناء يا غرزه *دايرين نشوف  مريخ  (قوت جالنت ) *ايها الناس *بارك الله في امل عطبرة المرق لينا محمد عبدالماجد من جحرو *الجحر كيف يا ابو حميد في السخانه دي ؟؟؟ *ولكن ما يحزن هو مانشيت جوهرة رمضان *تلميح واضح وفاضح *وبنفتكر انك اكبر من كده يا رمضان *قد نكون اخطأنا التقدير *فكلنا نخطئ *لكن سيرة شراء المباريات لو عدتم لها *سنعود لها بالتفصيل الممل *بالجلاكسيات واللاب توبات *بي بالبونيه *بي اتنين واطناشر *وبي حاجات تانيه حامياني *واذا ساءت افعال المرء بالطبع ساءت ظنونه *واتظنني *ايها الناس *ما سر الاتصال الغريب بعراقي ؟؟؟؟؟ *معقوله ؟؟؟؟ *قنعتوا من اهل الضلال واقتنعتوا بان الله لايصلح عمل المفسدين ؟؟؟؟ *واتصلحي *ايها الناس *نحن البطل برغم زعم الخيانه *وفي الآخر البطل واحد *بطل ما بموت *ولكن آخر خائن بموت بآخر طلقه *ديش ناووووووووو *ايها الناس *في الفاشر اخرجنا زكاة الموسم *في عطبره دفعنا الضريبه *والضريبه طبعا مازي الزكاة *بتهد الحيل *وتقديرها جزافي وخرافي ومزعن جدا *الحمد لله ادينا كل الاستحقاقات الحكوميه علينا *يعني من هنا ولي قدام الدخل كلو حقنا *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *الايصال الالكتروني سارينا *لكن عيبو بأخر فينا *الشبكه طوالي لاعلينا ولا حولينا *لكن تعال لي النسألك يا والينا *قول الايصال الجديد ضبط الفساد فينا *بعمل شنو مع الفواتير ام كباري يا والينا ؟؟؟ *يعني الحاجه تكون بي مليون مقطوعه من لحما لينا *ينكتب ايصالها الالكتروني بعشره مليون يا والينا *والكترونيا ينصرف من دما لينا سلك كهربا ننساك كيف والكلب ضحك في الايصال الالكتروني وقال لينا حيرتوني....هو ...هو...هو والي لقاء

سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.