بسم الله الرحمن الرحيم

في السلك

 *اكتب قبل لقاء امل عطبره *وقبل قلاء اولاد سيدي الحسن *الليله دايرين نتونس *ونسه لوجه الله *نفرق بيها عن الضغوط دي شويه *بس ماتفرقنا من بعضنا *في الاخر نحنا مجتمع واحد *مجتمع رياضي يشار اليه بالبنان *ونفخر باخلاقنا العاليه *قبل ما نتونس *محمد عبدالماجد من يوم التطواني وحشنا *وجات عليهو خسارة الوفاق *ونحنا شاربين جبنتنا وتامين الكيف غالبين سطيف *كل الحاجات دي اجتمهت عليهو واحتجب *وحشنا شديد *ماقدر يكتب عن عثمان حسين *لان خسارات ابو الهل كترت عليهو *وكتب كل اغاني عثمان حسين *خسارات ابو الهل اكتر من اغاني عثمان حسين *رسلت ليهو رساله *قلت ليهو وين يا ابو حميد *واحشني *واحشني دي ادتني فكرة *انو محمد عبدالماجد بعد الاحتجاب يعود باغنيات الرائع ابو عركي *ويبدأ لينا بي واحشني *لكن *ظهر علينا محمد عبدالماجد بالامس بمقال رائع روعته *حدثنا عن اعجابه باخلاق جمال الوالي *بانجازات جمال الوالي طيلة تلطاشر سنه *كلمنا عن عظمة مجتمع الرياضه *واستدل باهل المريخ في تأبين الرحال داؤود مصطفي *وكلمنا عن غيابات مجلس الهلال ومجلس المريخ حضور *عن عصرت محسن للفراش وخالد بخيت غياب *يا محمد عبدالماجد *نحنا داؤود ما مشحودين عليهو *وغيرنا في مجتمع الرياضه تجبره اخلاق الرياضيين للتواجد حيث الفقد الجلل *والاهله الشرفاء ماقصروا *سواء كان الاعلام او الاقطاب *طه علي البشير كان حضورا مشرفا ممثلا لكبار الاهله *وحتي المشجعين الاهله ماقصروا *يبقي غيابات كردنه وعمده وغيرهما من اعضاء المجلس *القي ليها عذر *وافترض حسن النيه *حتي ولو تلاشي ذلك الحسن بموقف الغياب القبيح *لان مجتمع الرياضه سمح جدا يا محمد عبدالماجد *ورحم الله داؤود مصطفي المسامح المتسامح السمح الجميل *المهم *دايرن نتونس *زمااااان في بداية الموسم *لما كان الاهله ببنوا في فريقهم *قلنا ليهم حيطتكم دي مابتنفع *بنيانها غلط *طوبكم الجبتوهوا ده ني *المونه ما حره *وساسكم ماغريق *الحيطه دي من اولها مايله *ناس روشا قالوا لينا ما مايله *بعد طلعت من ساس الفجيره ظهر ميلها *قالوا بجيبها البياض *ناس عمده جابوا طالوشهم وبدوا *يلطشوا سااااي *يوم بكري مابدقها *ويوم ماشين لوزان نستعدل الحيطه *ويوم خالين خانتو فاضيه عشان برجع *وقامت الحيطه لي فوق وظهرت الزيطه *بنيان كعب تب *قالوا الجير بجيبها *فطومه اختي مكيجتها ليك *ما خلت بوماستك *ماخلت ليك بوهيات المهندس *خلطة المانيه للبوهيه بالرقم *وكترت ليها بدرة الجوهره *ضلمتها ليك زياده *دخلتها حمام مغربي *اوردولووووووب *اتكومت في الواطه دي *كلمناكم *قلنا ليكم *حيطتكم دي مايله *ماسمعتوا الكلام *اسي وقعت في راس الاهله الشرفاء ديل *ذنبهم شنو ؟؟؟؟؟ *الليله دايرين نتونس ساي *لوجه الله *قال ليك واحد راكب حافله ام اربعه وعشرين راكب ديك *فيها نسوان ورجال *لاحظ ليك النسوان سارحات كلهن *يطقطقن في اصابعينن *ما صغار *كباااااار *لكن كلهن ماشات موضه *باقي التوب بكبر *وببعد العرسان *ولاحظ ليك الرجال صارين *كلو دقيقه واحد يطلق آهه وزفره *والجبهه زي الزنكي *مطبقه طبيق *قال للجمبو الحافله دي مالها ناسها كلهم كده ؟؟؟ *الجمبو قال ليهو *النسوان ديل عندهن مرض حامد *والرجال المصرصرين ديل عندهم نزار حامد *قال للكمساري دق ليهو هنا *الكمساري قال ليهو نازل ؟؟؟ *قال ليهو لأ دق ليهو عشان يرقص !!!نازل طبعا *ونزل يردد الله بيننا وبين مرض حامد ونزار حامد *المهم *لي اسي ماعارفين الثريا اتعاقدت مع ابو الهل ولا القصه خطوبه ساي *دي غايتو كردنه ما اظنو فاهمها *حقو روشا يعمل لينا كورس يشرح لينا الحته دي *باقي روشا بعرف الكلام عن مديونيات المريخ *يبقي بالتاكيد بعرف الكلام عن عقد الثريا *عقدت ولا خطوبه ساي والازياء كانت فتح خشم ؟؟؟؟ *ايها الناس *السنه دي ان شاء الله البطولة الافريقيه حقتنا *البطل نحنا *الخاين منو يا ربي ؟؟؟؟ *المهم *ياناس *يا بشر *يا هووووو *تعالوا نطبق شعار لا للمخدارات علي ارض الواقع *الشارع كلو بقي طاشه شبكه وواقع *القصه دي بتفقدنا جيل *وجيل ورا جيل بنتلاشي يا جميل *لا للمخدرات المعروفه *لا للمخدرات الالكترونيه *دي كمان قال ليك بالنت *الشافع يدخل الاوضه ينشط بالف *يجيك مارق ماتعرفو *لا ريحه ولا قول أه ولا بتترتح *بطش شبكه بس *لا لكل اشكال التعاطي من المخدرات *ولا لتبريرات الدستوريين التي تخدرنا *ادمناها *علاجنا بقي صعب *والاقلاع منها بقي يعني الاقلاع من الدنيا الحلوه دي *تعالوا نتعاون مع المكافحه *نكافحها في بيوتنا *في حلتنا *في شارعنا *في مدينتنا *في ولايتنا *في بلدنا *كفايه طاشه شبكة البلد *حقو نحافظ علي شبكتنا *المهم *واحد بدري الكلام ده *اداني سجاره *قلت ليهو شكرا ما بدخن *بعد شويه اداني سفه *قلت ليهو شكرا ما بسف *قال لي زول في المنصب ده ما بسف كيفن عاد *قال لي ارح البحر *قلت ليهو جني وجن البحر البجنن ده *كب لي شربوت *قلت ليهو ما بنفع معاي ,,,علي الطلاق مابعرف طعمو *عاين لي كداااااااا وقال لي *انت لا بتدخن ولا بتسف ولا بتمشي البحر ولا بتشرب شربوت ولا بتحلق *راسك ده ما بتصرف عليهو اصلو ؟؟؟؟؟ *المهم *اتوقع نصر كبير واداء جميل للزعيم بعطبره *وكذلك نصر كبير للزناطير *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *زمان في صنف واحد معروض علينا *اسي بقن مليون صنف يا والينا *البحر ده بكمل العقل الفضل لينا *همتكم معانا يا والينا سلك كهربا ننساك كيف والكلب مشي البحر  لقي البحر زايد علينا ....بقي يردد ماكعب البنقو ...كعب البنقو الكعب ,,,هو هو بقي مابقولها لينا والي لقاء سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.