بسم الله الرحمن الرحيم

في السلك

*امس كان تكريم الرائع اسماعيل حسن بدار النادي *قروبات شفوت المريخ كرمت الرائع اسماعيل حسن *الرجل يستحق التكريم وسلام تعظيم كمان *تاريخ اسماعيل حسن مشرق ومشرف وجميل *والرجل جميل وصاحب قلب كبير *قدم للرياضه وللمريخ وللانسانيه *استاذ في الانسانيه واحترام الآخر وحب الناس *بل بروف بجداره *ولان الرجل رائع *كان يوم تكريمه يوما رائعا *من اجمل الايام التي عشناها يوم امس ده *ان شاء الله يا اسماعيل  لو دي الطريقه كلو يوم يكرموك *ويباركوا ليك ويباركوا لي *لن ننسي يوم امس ده ما حيينا *يوم شكرك مايجي يا اسماعيل *ولكن تستمر ايام تكريمك طيلة السنه *المهم *واحد مواعدني بي قريشات لامر هام *كنت واثق فيهو لكن خايف من الشره *الشره حاااااااره *وشلت هم شري *شهر شايل هم شري *الراجل في مواعيدو جاني براهو *زعلت من نفسي *كيف اظلم الراجل واشيل هم شري *قام بعد شرب العصير فتح الشنطه *قلت خلاص داير يعد لي *طلع لي اوراق وقال لي *شوف دي كلها قروش عند ناس ما جابوها *والله لو لا كده كان جبت ليك معاي القروش الطلبتها *وكمل العصير وقام مرق *بقت كمان عليها كباية عصير بآخر السكر الفي البيت *والهم الشلتو شهر ما اشتغل بيهو *هم شري ماجاب حقو *شكيتك علي الله كان شيلتني الهم في الفارغه *ايها الناس *غدا نستمتع بابداعات اولاد غرزه *غدا ننتصر للسودان ولطموحاتنا وللواقع *كلو زول يقوم بي شغلو كامل *وما يتدخل في شغل غعيرو *كده سننتصر ان شاء الله *وتشكيلة النصر هي *غرزه وانطونيو ومحسن في الجهاز الفني *اللاعبون في الملعب *الشفوت علي المدرجات *اعضاء المجلس علي المقصوره *كلو زول يقوم بي شغلو في مكانو *زول يتدخل في شغل زول مافي *عشان نحتفل بعد المباراه جميعا *نحتفل مع بعضنا *نرقص بادب ممزوج بالفرحه *رقيص هابط ما معانا *ايها الناس *ماتنسوا *الشفوت خارج الاستاد *كلو شفت يرسل تمن تذكرتو علي الرقم 2870 *زين وسوداني *وناس المقصوره *عضو مجلس عضو مجلس وزراء *كلو زول يدفع مليون *ايرين ننافس انفسنا في الدعم *دايرين نجهز اربعه مليار تودينا المطار *ايها الناس *ما تقصروا *وصدقوني بنتقابل حيث نستمتع باللقاء *بنتقابل زي ما اتقابلنا قبل كده لمانديلا وسيكافات تلاته ودبي والشارقه *بنتقابل في الارض التي احببناها واحبتنا *ايها الناس *قون واحد بكفينا *يبقي ما نستعجل القون *يجي بي مزاجو *وياحلاتو لو جابو العقرب *ولو ما اتوفق لا قدر الله *يكون بي باص من العقرب *اصلنا الموسم ده اتعودنا اقواننا تكون قارصاها عقرب *ايها الناس *نحن الاجدر بهذه البطوله *يجب ان نعمل علي نيلها بوعي وادراك واصرار *انفعال ما حبابو *بالغير انشغال برضو ما حبابو *كلنا من اجلنا لا من اجل اي شئ لا يخصنا *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *المويه لسه لما تجينا بتجينا بي طينا *الواحد لو داير يستحمي يا والينا *يغسل المويه اول من طينا *شربنا يا والينا *يرضيكم نشرب بس ورينا ؟؟؟ *اسي بالظروف الفينا *لو لقينا طريقه لي  غسيل عمله يا والينا *نغسلها  والمويه بي طينا ؟؟؟ *دحين ما بتشربا علينا ؟؟؟؟ *والعالم كلو يؤشر علينا *ديل اسياد العمله الوسخه ويحرج فينا سلك كهربا ننساك كيف والكلب حلف بالتقطعوا تاني ما يجينا والي لقاء سلك عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.