بسم الله الرحمن الرحيم
في السلك

*الاحباط الذي تسببه قناة النيلين لجماهير الرياضه
*احباط فاق الاحباط الناجم عن اهمال المنتخب من قبل الدوله
*قناة ابجديات العمل الفني عندها معدومه
*والمشكله ليست مشكلة معدات وكوابل
*المشكله مشكلة كوادر
*لان شغل الوظائف عندنا اضحي بالخيار والفقوس
*لذا تكثر الاخفاقات في التعيينات
*ويخسر العمل
*ولكن لا احد يهمه العمل بقدر ما يهمه الانتماء للبدور العمل
*شاشه غشاشه
*وصوت مبحوح ومتقطع
*بل يجيك مرات بي حشرجه
*ومرات مبحوح
*وقمة الاستفزاز
*الترويج
*قناة متخصصه ومتفرده
*ايها الناس
*اخفاقات قناة النيلين كترت شديد
*واذا مافي زول بسأل
*حقو نعرف انو الله بسأل
*الله بسأل الزول المفروض يسأل
*وبسأل من قبض الاجر عن جودة العمل
*وبسأل من حق الناس الانكوت باخفاقات قناة النيلتين
*ايها الناس
*الاستاذ زهير عبادي
*كان شجاعا جدا في حديثه عن القناة
*ومن داخل استوديو القناه
*لم يجامل ولم يتجمل
*فزهير اعلامي كبير ومهول
*لايعرف المداهنه ولا غطغطة الكرور
*احييك اخي زهير
*ولكن لك ان تعلم
*من يقول الحق في هذا الوطن
*يدفع الثمن غاليا
*ولكن يبقي له الموقف
*يحفظه التاريخ والاجيال
*شد حيلك يا ابو الزوز
*بلا نيلين بلا نيله
*ايها الناس
*حقو الاتحاد يشترط علي التلفزيون القومي عند التعاقد
*يقول ليهو لو داير تنقل الممتاز بالنيلين
*اختانا يا اخوي
*بننقلوا بالكارو وبصل الناس اخير من نيلتكم دي
*المهم
*البلد كلها سخانه
*مع الصيام وقطعت الكهربا الناس انشوت
*الا في كوستي
*كوستي ضربها الهمبريب
*فتح شبابيك الحبيب
*وحال اهل كوستي الطيب يطيب
*سهرة رائعه قدمها اولاد غارزيتو بكوستي
*وانا لو محل ناس المريخ
*كلو خمسه دقائق بلعبها في حي بكوستي
*زي السينما المتجوله
*عشان الناس كلها تشوف العجب
*تستمتع بالروائع
*وبزيد فترة العرض تلاته يوم تاني
*عشان ناس الحلال  والقري يتفرجوا
*برضك ناس الحلال ديل ناس
*وبحسوا وبشعروا
*ومن حقهم ان يستمتعوا
*ايها الناس
*نناشد الاتحاد بدل يضيع زمنو في كورة الامل تتعاد ولا ما تتعاد
*حقوا يجتمعوا وينظروا في زيادة عروض المريخ بالولايات
*المريخ لما يمشي ولايه
*يكون العرض تلاته يوم
*يلعب مع فريق الولايه تلاته يوم علي التوالي
*عشان كلو يوم يستمتع فيهو جمهور غير
*والمريخ يستطيع ان يعيد العرض تلاته يوم بدقه متناهيه
*فالمخرج غرزا قادر علي ذلك
*وحقو مباريات المريخ في الولايات
*نعملها كورسات
*البحضرها يشيل شهادة معتمده وموثقه
*المريخ كبير ما زناطير ساي
*واقترح علي مجلس المريخ
*ان يطلب من الاتحاد ان يبرمج لنا مباريات الولايات
*كلو كورتين في نفس الوكت في ولايتين مختلفتين
*يعني نلعب في كسلا وفي نفس الوكت في الفاشر
*يومنا الولائي بسته نقاط وتمنيه اهداف
*انه رمضان
*حيث يربط الشيطان
*يظهر كلو شئ علي حقيقتو ويبان
*المهم
*مستوي الهلال الشفناهو ضد النسور
*وضد اشبال اشبال النجم بتونس
*وضد الامل وضد اهلي شندي
*لايؤهله لمنازلة مازيمبي نهار رمضان
*كان صامو ووووب
*وكان فطروا يكونوا ضيعوا النتيجه والصيام
*ايها الاهله الشرفاء
*الهلال كبير
*لكن كمان ما بنرضي ليهو يتغلب كتير
*لذا ولذلك وكذلك
*نري ان ينسحب الاخوه الاهله من التنافس هذا العام
*والانسحاب ما مشكله
*قبل كده انسحبوا من وفاق سطيف
*الحصل شنو يعني
*ونري ان الانسحاب فيه حفظ لكرامة الهلال
*وانقاذ له من التهلكه
*فالمواسير التي خلط صديقي عماد بينها وبين مواسير المغلق
*لن تستطيع ان تقف امام مازيمبي ربع ساعه
*لن تستطيع ولو احضر كبسور الفيفا وادخلها الملعب
*الموضوع كبير
*ستذهب المواسير
*وتبقي الهزيمه الثقيله في جبين الهلال
*وجبين الهلال ما ناقص
*كفايه ماقاله الراحل البابا
*عن ان تغيير اتنين لي اطناشر وصمة عار في جبين الهلال
*الجبين نديان بالعمايل
*مافي حته لعمليه جديده
*انسحب يا كبسور واشتكي
*قول ناس مازيمبي ماصايمين
*والهلال ما بلعب مع زول فاطر
*قولوا اي شئ
*برغم ان ماكسيم وسيسيه واتير وكيبي وجوز مواسير البرازيل ونيلسون والكاردينال
*الكاردينال ما معاهم ده لقب ساي
*كردنه بصوم
*برغم انو ديل كلهم جالدين
*لكن فطور ناس مازيمبي ما فطور نصاح
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الكهربا اساسا ما بتجينا
*الكلام ده عارفنو دستوريينا ؟؟؟
*ولا ماجايبين خبر قاعدين في كندشة مكاتب محرمه علينا
*ومافي زول مصدق انو في ناس شغلتهم يجيبوها لينا
*كان غلبكم توفروها لينا يا والينا
*زحوا لينا
*برانا بنقتسم سلطتنا وثروتنا ونجيب كهربتنا لينا
*وبنعمل في المدارس مجانية التعليم والزامية الترميم ونظافة الشوارع والزينه
*وبندعم السلع الضروريه  ما ضروريه ونساوي بين الناس امام الوظيفه العامه يا والينا
*ونقعد نغني باعلي اصوات فينا
*تاااااااااتي السودان مشي
*تااااااااتي مجاني مدرسه
*تااااااتي عز وحنكشه
*تااااااتي كهربا وكندشه
*تااااااتي مانا ملطشه
*تااااتي مافي غشغشه
*بنقدر يا والينا
*دي سلطة وثروه موش لعب يا اخينا
سلك كهربا
ننساك كيف وتااااتي بقينا ملطشه
والي لقاء
سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.