بسم الله الرحمن الرحيم
في السلك

*حدثني يوسف  الفكهاني
*اشهر فكهاني بامدرمان بشارع العرضه
*وكلمني عن الموز
*قال لي الموز يا اخضر يا اصفر
*ولما تجيب الموز اخضر وينجض عندك بكون افضل
*لكن لو جبت الموز اصفر
*لما يصلك بكون باظ
*بكون بقي لييييين
*وقشرتو بتسود
*بحثت في كلامو لقيتو صاح
*لانو لو جبت ليك موز من البرازيل
*اخضر واصفر
*الاخضر لما يصلك هنا
*احتمال ينفع واحتمال ما ينفع
*لكن الاصفر بصلك سلطه
*وهكذا لاحظ لي برازيليين الهلال
*الاخضر قالوا  اول اول امس جاب قون
*برغم انو في رديف رديف النجم
*لكن في الآخر قون
*رغم انو مشكوك في صحتو
*لكن الاصفر قالوا مالعب
*بقي مديده
*وباتباع نظرية يوسف الفكهاني
*حقو البرازيلي الاصفر ده ترجعوهوا قوام وترجعوا قروشكم يا محمد عبدالماجد
*والنجم الساحلي اللعب اول اول  امس ضد الهلال ده
*قبلها بيوم  كان لاعب في الدوري وغلب اربعه
*وبعدها بيومين عندو كورة في الكونفدراليه
*تفتكروا كورة الهلال ولا كورة الدوري ولا كورة الكونفدراليه البلعبها النجم بالرديف ؟؟؟
*اكيد بلعب كورة الكونفدراليه بالفرق الاساسي
*وبلعب كورة الدوري بالرديف
*وبلعب كورة الهلال  الرهيف برديف الرديف
*واتردفي
*المهم
*سمعت تحت تحت
*انو البرازيلي ابو اسرة كريمه ده
*الشفنا اسرتو في المطار معاهو
*قالوا دي بتو و الشافع المعاها ولدها
*حتي ولدها مسمنوا علي جدو
*عشان كده بقولوا ليهو جدو
*وعندو مدرسة تعليم قيادة سيارات في البرازيل
*الموزه الصفراء دي ترجع يا كردنه
*بتزلقكم وتكتل ليها زول
*المهم
*شرف الزعيم تونس
*تونس كلها جات تشوف بكري المدينه
*في ناس بشوفوهوا بالعين ساي
*وفي ناس بحاولوا يهبشوهوا بايدينهم
*دايرين يتأكدوا
*ده زول عادي كده زينا
*ولا زول من كوكب تاني
*زول سرعتو تلاته الف كلم /ساعه
*طياره يا عمك
*طبعا الجماعه الكانوا بقولوا في تونس نحنا من طرف بكري المدينه
*سوقهم نام
*طرف شنو يا حبيب
*الاصل وصل
*واحد قلت ليهو برازيليكم ده كبير
*قال لي يعني اكبر من علاء يوسف
*قلت ليهو علولو الجابو لي ده شنو ؟؟
*علولو يادوبك برجم
*ده بكون ضرس العقل قام ليهو لما البرازيل شالت كاس العالم المرة الاولي
*قال لي لعاب
*قلت ليهو انا من شفت اسرتو معاهو في المطار
*عرفتو لعاب
*المهم
*بلاتر استقال فسادا
*اذا عمل فساد
*او اذا لمجرد الاتهام بالفساد
*ياربي اهل العوض العندنا ديل عارفين الكلام ده ؟؟؟؟
*يا اهل العوض
*العوض بالغ عديل كده
*جننا
*ده بعد شويه لو سالتوا الخواجه بقول ليكم
*باقي لي العوض بتكلم انجليزي قريب ده
*خرمجتها يا العوض
*عوض التاباني
*ايها الناس
*اهمال المريخ لانتخابات الاتحادات
*هو السبب الرئيسي البجيب اشكال العوض واشباه العوض في اللجان
*وده السبب الرئيسي البدهور الكورة في البلد دي
*واذا كان الانسان لا يستطيع ان يلبس عباءة القوميه والحياديه
*حقو ما يتظاهر بخلع عباءة الانتماء الضيق
*عشان شكلو ببقي شين
*وما شرعي
*ولو مشي في الشارع بالعباءة الضيقه
*وحصل ليها اي انفتاح
*بتحرجوا
*وبتدينوا تحت العديد من المواد
*اقلها خدش حياء امرأه
*ايها الناس
*هل الفساد الذي يتهم به بلاتر في قصة رشوة جنوب افريقيا ؟؟؟؟
*الله يستر
*انا خايف الحكاية تجر
*واذا جرجرت تبقي زمجرت
*واذا زمجرت قاعدين ليه ما تقوموا تروحوا
*عزيزي بلاتر
*لا العوض ولا اهل العوض عارفين انت استقلت ليه
*خليك ثقيل وابقي  العوض يا خواجه وتقل دمك واقعد
*المهم
*ايمن سعيد يصل ما يصل
*الباشا ظروفو نقدرها ما نقدرها
*علاء يبرجم يبرطم
*ده كلو هين
*الزول ده !!!!!
*الزول ده زي البنطلون المقدود
*بحرجك بحرجك
*الجابرنا علي قد البنطلون ده شنو ؟؟؟؟؟
*المهم
*المعسكر قصير
*المعسكر مربوع
*شامي لي ريحة مطار
*ريحة المطر كيف يا محمد عبدالماجد !!!!!
*محمد عبدالماجد
*شفت العوض !!!!!
*اهل العوض جايين متين ؟؟؟؟؟
*ايها الناس
*تم تدشين ديوان الاستاذ الشاعر الكبير
*ملك القوافي ومك الكلمه
*الزبير عبدالكريم
*جاء الديوان باسم
*النجيمات المضيئه
*كان يوما رائعا احتضنه دار النادي
*وكان التمثيل حضورا مشرفا
*وابدع من غني
*وابدع من قدم الروائع
*وابدع من تحدث
*ابداع كان في حضرة الابداع
*يقول استاذنا الزبير
*فمعذرة انني قد وجدت لعشقي المقام العطوف الاحن
*وجدت ولاء الشباب المعافي فيا سعد من ضمهم واحتضن
*عقيدة هذا الكيان استطالت فاضحت سلوكا به نمتحن
*الم تجعل الود فرضا علينا وتغرس فينا التآخي سنن
*مبدع هذا الرجل
*ولان المريخ دائما الاول
*ويحب اول
*ومرات الوحيد
*اول فريق بني استاد
*الوحيد الجاب بطوله جويه
*عشان كده
*استاذنا الزبير اضاف لينا اول جديده
*اول ديوان شعر يتحدث عن نادي في العالم
*ياعالمي
*ايها الزول
*الديوان طرف اسماعيل
*احجز نسختك
*للتاريخ ولي مكتبتك
*الاتصال علي اسماعيل تلفون 0912713220
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الشمس سخنت علينا
*تكونوا قلعتوا تظليلها يا والينا !!!!
*اعتبروها دستوريه يا والينا
*وتاني ظللوها لينا
*اصلو التظليل محرم علينا محلل للدستوريينا
سلك كهربا
ننساك كيف والشمس وصلت هنا ....هنا ده
والي لقاء
سلك

 عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.