بسم الله الرحمن الرحيم

في السلك

 

*قروبات العشاق علي صفحات الفيس والواتساب

*املنا فيها كبير

*وتحدثنا عنها وعن امكانية دعمها للكيان

*دعما معنويا وماديا وفكريا

*وهي بمثابة معاهد لتدريب وتاهيل الكوادر الاداريه

*التي تستطيع ان تقود المريخ حاليا ومستقبلا

*وتستطيع ان تنشئ تجمعات خلاقه تبدع في مسيرة الزعيم العالمي

*وحينما تنادي جماهير المريخ معشوقها بالعالمي

*يبقي هي تعني ما تقول

*ياعالمي

*ماقادني لتلك المقدمه الصغيره

*هو تكريم قروب ملتقي الصفوه العالمي للمجلس والجهاز الفني واللاعبين والاعلام

*كانت احتفاليه راقيه ومهذبه ورائعه

*كانت عنوانا كبيرا وبارزا لتلك المجموعه الخلاقه

*ابدع محمد عيسي

*واستحق الوالي التكريم

*وكان تكريم غارزيتو وفاء لعطاء باين للعيون

*واستحق اسماعيل حسن الرائع التكريم

*واستحق مزمل ابو القاسم المكمل كمل للتكريم

*ومثل بله الشفوت في التكريم

*التكريم في عمومياته كان دعما معنويا كبيرا

*وزادا لمرحلة المجموعات

*شكرا لكل شفوت القروبات والروابط والمجموعات

*وياها المحريه فيكم

*ومستنين منكم الكتير المثير

*المهم

* مثقفون ومثقفاتيه

*كانوا بتكلموا عن الوالي

*المثقفاتيه بعد زعمطت صوفتين بطرف الاصابع

* وبعد افتكر واعتقد والحته دي وزي في نقطه محوريه ضايعه من الحوار وشكل الطرح

*قالوا

*في عهد الوالي كان بالامكان افضل مما كان

*والمثقفين كانوا بشوفوا انو ماكان كان اجمل مافي الامكان

*ودللوا علي ذلك بقولهم

*انو الاستاد الذي نفاخر به كان في عهد الوالي

*وانو استجلاب الاسماء الكبيره في التدريب ووسط اللاعبين كان في عهد الوالي

*وانو منصرفات الكيان عمرها ما نضبت في عهد الوالي

*وانو الداعم الوحيد هو الوالي في زمن الوالي

*نطه واحد بتاع بحر اصلي

*قال الاتصرف علي المريخ في زمن الوالي قدر الدخلوا المريخ ؟؟؟

*قالوا ليهو المثقفاتيه نعتقد انك بلورت الفكره في خضم التناول الموضوعي

*طبعا الاجابه ما اقنعتوا

*قبل علي المثقفين

*قالوا ليهو ابدا الاتصرف علي المريخ في زمن الوالي ماقدر الدخلو المريخ في زمن الوالي

*قال ليهم اكتر الاتصرف علي المريخ في زمن الوالي ولا الدخلوا المريخ في زمن الوالي ؟؟؟

*قالوا ليهو اكتر الاتصرف علي المريخ في زمن الوالي

*قال ليهم الفرق بين الاتصرف علي المريخ في زمن الوالي والدخلوا المريخ في زمن الوالي الدفعوا منو ؟؟؟

*قالوا ليهو الوالي

*قال ليهم في زمن اولادنا ماقادرين نوفر ليهم حق الفطور في المدارس

*في زمن بنتعالج فيهو بالحلبه والقرض والعطرون هروبا من العلاج الخيالي

*في زمن اعراسنا فيهو بقت الخطوبه عقد وقرض علي كده طوالي

*ويدفع ده كلو براهو ؟؟؟

*بتتناقشوا في شنو انتوا يا ناااااااس !!!!

*ومشي علي البحر

*باقي الدنيا سخانه  شديده  اليومين دي وما بتتقعد بدون بحر

*ايها الناس

*امس قرينا في قون مانشيت

*بلاغات الهلال تقفز بالزانه شيك جديد ضد الهلال من السلام روتانا

*محمد معانا ما تغشانا

*لكن في حته محيراني

*قالوا كردنه دفع قروش سودانير لصحفي كبير

*من سنة الفين وتسعه

*والصحفي ما وداها

*طيب

*صدقنا

*سودانير تفتح بلاغ جنائي في مديونيه عاديه بدون شيك كيف ؟؟؟

*سودانير بتفتح البلاغ لما يكون في يدها شيك

*ولو افترضنا كردنه كتب الشيك الوكت داك مثلا

*وجا سدد المبلغ للصحفي حسب كلامهم

*ليه ماطالب الصحفي باسترداد الشيك من سودانير ؟؟؟؟؟

*شيكات الهلال حيرتنا

*بتطير اكتر من سودانير

*والله سوداني لو بتطير قدر شيكات الهلال دي

*كان بقت اعظم ناقل وطني في العالم

*كان السماء ده لقيناهو كلو سودانيرات طايرات

*وطير يا طيارة طييييييييييري

*محمد معانا ما تغشانا

*المهم

*منتدي جماهير المريخ

*عودنا وتعود دائما ان يقيم افطار رمضان الشهر كلو بمسجد المريخ

*افطار زي الافطار قشه ماناقصه

*والباب مفتوح علي مصرعيه للجميع

*ومن اجمل مالفت نظرنا في ذلك الافطار

*ان اخوة اهله شرفاء يتناولون افطارهم معنا

*نداعبهم ويداعبوننا

*نحقق مقصد الشهر الكريم جميعنا

*ونثبت للعالم ان وسطنا الرياضي بخير وعافيه ومحبه

*والدعوه مقدمه للاهله الشرفاء الماجونا

*رمضان ان بقي شهرين ونص

*فطورنا باذن الله مدور بي شياتو ونياتو والحلو مر حلاتو

*لكن ايها الاخوه

*واخص راس الرمح عماد عقيد

*والاخوه عبادة تاج السر ومهوده

*رمضان قرب

*والموضوع ماشي بطيئ

*الهمه الهمه

*حقت الله حرم ما بنقصر فيها ولا بتقصروا فيها

*اتكفل باكلفة الافطار يوما

*يلا همتكم نمرق حقت الله في رحاب الزعيم

*صدقوني

*شامي لي ريحة مطار

*في ناس شامين ريحة مطر

*وفي ناس ريحتهم طير طير

*ايها الناس

*ان تنصروا الله ينصركم

*اها

*نجي لي شمارات والي الخرتوم

*كان شفت يا والينا

*الكبري الطائر بتاع ود البشير في وش امبده العملتوهوا لينا

*انتهي يا والينا

*وقافلنوا علينا

*وماشفتوا الزحمه الفينا

*يا تفتتحوهوا لينا يا والينا

*يا نجيب خالتك قسمه تفتتحوا لينا

*و وما تستبعدوا لو شفتونا معنقلين فوق يا والينا

سلك كهربا

ننساك كيف ولو مافتحوا لينا وقسمة ما اشتغلت بينا يبقي رمضان في الزحمه دي والسخانه معليش يا حكومه اعذرينا

والي لقاء

سلك