بسم الله الرحمن الرحيم
في السلك

*ماعارف ليه بعض جماهير المريخ بتنجرف خلف الشائعات بتاعت المعسكر التاني
*معسكر الجوهره للاجئين الافارقه
*الناس ديل يا ناس
*شغلهم الشاغل ان يشغلوا المريخ
*يشتلوا في الشائعات
*وينشروا اعلاميا
*وللاسف بعض جماهيرنا تصدق وتذهب معهم في دربهم متوتره
*مين القال غرزه بتاع مشاكل ؟؟؟؟
*وهل الاستقرار والتطور الفني الذي شهده المريخ في عهد غرزه ببقي مع زول بتاع مشاكل ؟؟؟
*غارزيتو هو رئيس الجهاز الفني
*وبالتالي يختار من يعاونه
*وهو حر في تقييم من اختاره
*وهو حر في استمرار معاونيه من عدم استمرارهم
*لانو لايمكن لغرزه ان يطبظ عينو باصبعو ويبعد اي فني  جيد يضيف للفريق
*حكيم السبع مدرب الحراس مدرب كبير وقدير
*ماقلنا شئ
*ولكن غرزه رأي ان هذا المدرب لايقوم بواجبه كاملا
*العيب شنو في طلب غرزه بابعاده ؟؟؟
*وحكيم رشحه غرزه للمريخ
*ولكن اداء حكيم لم يعجب غرزه
*الوزير ممكن يقيلوهو اذا ماقام بي واجبو
*عادي جدا
*اما قصة محترفين مصابين
*لو كان غرزه يتاجر بهم
*هل طالب غرزه بتسجيلهم دون اجراء الكشف الطبي واتباع باقي الاجراءات ؟؟؟
*بالطبع لا
*وكم سيكسب غرزه اذا سمسر فيهم للمريخ ؟؟؟
*وهل سيكون مكسبه اكبر من مكسبه المادي والمعنوي كمدرب حامل لكأس افريقيا اذا توفق ؟؟؟
*غرزه عقده معانا سنه
*ولو توفق في كسب ود الاميره الافريقيه
*سعرو حايطير السماء
*يبقي احسن ليهو الاميره ولا السمسره ؟؟؟
*ايها الناس
*فكونا من الشائعات بتاعت معسكر الجوهره للاجئين دي
*وهم لو عندهم شغله حقو يقضوها لي فريقهم
*اطناشر ماسوره افريقيه في كشفهم
*ده غير موضوع احمد بيتر
*وفيهم ماسوره مكسوره
*موديل كانوتيه
*تنقط ليها سته شهور
*زول شافها في الميدان مافي
*بس شايفين الطين والخمج
*وحقو ناس معسكر اللاجئين ديل يشوفوا صرفه للنفايات الافريقيه دي
*نفايات الكترونيه
*موش كردنهفي الفجيره جاب ليهم آي بادات
*خلاص يبقوا نفايات الكترونيه
*عليهم التخلص منها
*بس الخوف يتخلصوا منها لاندية الممتاز
*والنفايات المسرطنه بتجيب السرطان
*نحنا براهو دورينا ملكلك
*عشان كده التخلص منهم يكون بترحيلهم خارج البلاد
*واقترح يكون الترحيل تحت اشراف ناس حماية المستهلك
*النفايات دي لو استهلكناها هنا بلدنا دي
*صدقوني عيدالفطر ده مافي زول برجاهو حي
*ايها الشفوت
*لاتنقادوا خلف شائعات القصد منها خلق جو متوتر بيننا
*المجلس عارف بعمل في شنو
*والجهاز الفني عارف بعمل في شنو
*وزي ما قبل كده الناس احتجتعلي اشراك ضفر كلاعب وسط
*وبعد ربع ساعه فقط اقتنعت
*حقو نخلي الخبز لخبازو
*المريخ الكبير يمضي للامام
*لكن المريخ الصغير منتهي الاهمال
*لو في كلام يبقي عن الرديف والاشبال
*الكبار ماشين صاح
*لدرجة شمينا ريحة مطار
*وغرزه قال
*المرحله دي محتاج فيها للاعب جاهز
*يعني مابجيب مواسير يا ناس
*ايها الناس
*ليه غرزه لما سجل لي مازيمبي ماجاب مواسير ؟؟؟
*غرزه في الهلال جاب اكانغا
*واكانغا كان اهم لاعب بالهلال
*يقوم بدور ايمن سعيد الحالي عندنا
*ليه ماجب ماسوره وسمسر فيها للهلال ؟؟؟
*ولا عشان ناس الهلال براهم بعرفوا سوق المواسير وين وبجيبوها
*اسي سيدي بيه ده موش جابوهوا زمن غرزه ؟؟؟
*جابوا غرزه ؟؟؟
*براهم بلقطوا مواسيرهم
*شخصيا مقتنع بقدرات غرزه
*ولو طالب بتسجيلي انا ما بستنكر
*لكن بقتنع باني لاعب كبير
*خلو العيش لخبازو
*اقفلوا باب الشائعات المضره
*وبتبدأ المجموعات
*نشوف مين البطلع بره
*الحتانه جااااااهزه
*والسنه دي السرير في الحوش واااااحد
*سرير الجوهره
*المهم
*بكري لايك الناس لبانه
*ونحنا كلما نشوف بكري بنعمل لايك
*والناس لايكين موضوع بكري لبانه
*اي اخفاق يقولوا ليك ملف بكري فتحناهو
*وبعد شويه قفلناهو
*ومع الاخفاق الجديد فتحناهو
*ملف بكري ده تفتحوا فيهو وتقفلوا لما مفصلاتو خربن
*ولكن لي سؤال
*البرير كسب قضيته في لوزان ليه ؟
*عشان اثبت براءته
*ولا عشان الطرف التاني لم يقدم دفوعاته ؟؟
*عشان القصه بتفرق كتير
*وحقو روشا وخالد عزالدين يكتبوا لينا عن اسباب نجاح قضية البرير بشفافيه
*واذا الطرف التاني ما قدم دفوعاته
*برضو يورونا ليه وعشان شنو ولماذا ؟؟؟؟
*قال لوزان قال
*اذا كان للهلال قضية ضد بكري
*لماذا وقع نزار حامد في مكاتب الاتحاد
*كان يوقع علي ورقه مروسه في بيت كردنه
*لو كان اصلا التوقيع في بيت كردنه توقيع يوافق شروط التوقيع والتعاقد طبقا للائحه يا بهوات
*بكري كلما يجري يجروا علي ملف بكري
*حاتجروا كتيييييييييييييييييييييييير
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*يا حليل مدارس زمان ويا حليلنا
*حليل زمن الولد دخل والجمل خرج
*حليل زمن البلد بلد البنت والولد
*حليل زمن الدود في العود
*ابوك موجود !
*والخروف ضبح مسعود
*حليل بدر وأمل
*وحليل زمن با بقر
*حليل زمن الكتب بتراري
*ودرس العصر مجاني واجباري
*والتعليم الزامي
*ومحو الاميه
*اسي المدارس بقت تدفعنا نحو الاميه يا والينا
سلك كهربا
ننساك كيف وغيرنا محو الاميه لنحو الاميه
والي لقاء
سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.