بسم الله الرحمن الرحيم
في السلك

*ولأن الابداع مريخي المولد والمنشأ كان النصري
*النصري مبدع بالفطره
*وابدع النصري طربا حينما غني
*يا الطالع دوام ونازل مع انفاسنا
*سودانك مشرفوا وديمه رافع راسنا
*لون الدم شعارك وده البزيدو حماسنا
*يا مريخنا يا المالك زمام احساسنا
*يا الطالع دوام ونازل مع انفاسنا
*اتوقع ان نؤدي اليوم اداءا يشبه ابداع النصري
*واتوقع نصرا من عند الله كبير
*لان المنطق والمعقول يقولان
*يفترض ان نفوز بعدد مريح من الاهداف
*لان فرق المستوي بين الفريقين
*مع احترامنا للاخوه الاهله
*زي فرق الشلن اليوغندي من اليورو الاوروبي
*ابو الهل اتمقلب في تسجيلاتو
*بالذات في المحترفين
*فأتي بحداشر محترف عبارة عن مغترب
*افريقيا كلها مافيها فريق عندو حداشر اجنبي الا الهلال
*ديل محترفين ولا لاجئين يا محمد عبدالماجد
*ولانهم فشلوا
*ولان اعلام الهلال لايريد ان يعترف بالفشل
*ربطوا لي جماهيريهم مكنة الاعتماد علي النشئ
*طيب لو دايرين تعتمدوا علي النشئ
*جايبين لاجئين قدر ده ليه ؟؟؟
*ايها الناس
*يقولون ان قانون القمة هو ان يخسر الاكثر جاهزيه
*اليوم نريد تغيير القانون
*ليسود المنطق وتسود العقلانيه
*ليفوز المريخ وهو الاكثر جاهزيه
*باهداف مريحه في العدديه
*فابو الهل مع احترامنا له
*مستواه ليس بافضل من اهلي مدني
*لذا الخمسه ما شاذه
*ايها الناس
*خسرنا مباريات كثيره ونحن الاكثر جاهزيه
*وفي بعض المرات نكون الاقوي
*وتخرج المباراه تعادليه
*لانهم حينما يقتنعون باننا الافضل
*يتمسكنوا
*فيقتلوا العزيمه فينا
*فتخرج تعادليه
*ونحن بين مصدق ومكذب
*انه جيل مضي
*لم نكن قبله علي ذلك الحال
*ونحن الان بعده لن نكون علي ذلك الحال ايضا
*لاننا الاجدر بالفوز يجب ان نفوز
*وباكثر عدد من الاهداف
*القصه مستويات
*لان اعدادنا ومهاراتنا وانسجامنا هو الاجود والافضل
*وعلي الجماهير ان تأتي بالفهم ده
*تاتي لتقوم بدورها كاملا
*ومن ثم تحتفل بعد النهايه
*يحق لها الاحتفال بعد ان تقود فريقها للانتصار
*غرزه ما بوصوهوا
*وعلي اللاعبين ان يدركوا جيدا
*مسكنة الجماعه لا تشفع لهم
*يشيلوا شيلتهم براهم
*نحاربهم داخل الملعب بشراسه
*ونتغابي فيهم العرفه
*وبعد الكورة اخوان واحبه
*الرياضه كده
*وشرف التنافس يجب ان لا يخدشه خطأ حكم
*حتي ولو كان لايظلم
*ايها الناس
*بكري لو جري قولوا واحد
*ولو جري تاني قولوا اتنين
*ولو جري للمرة التالته
*قاعدين ليه ماتقوموا تروحوا
*انها مباراة بكري
*لازم يحتفل بقفل ملف لوزان
*هو ملف لوزان اتفتح من اصلو ؟؟؟
*بكري كان جري اركز يا جنا
*البقت بقت
*ايها الناس
*المريخ كبير
*وله مدرب يعرف من اين تؤكل الكتف
*جيبوا شطتكم ساي وتعالوا الاستاد
*ايها الناس
*الكرة قررت ان تتأدب
*وتأدبها هو انصياعها لاوامر غرزه
*ومطاوعتها لاقدام الموهوبين
*ناس اوكرا وكوفي وشيبون
*المهم
*قالوا بكري كان بتمرن في شارع مدني
*جا جاري الرادار لمحو
*قدر ما حاول الرادار يشوف نمرة بكري غلبو
*الليله مساوي حايبقي زي  الرادار
*لما الكورة تنتهي لو قلت ليهو نمرة بكري كم
*الا يجي وراهو عشان يشوفها
*الفراري
*الريح
*اب زرد
*ايهاالناس
*الناس ديل لما نكون كعبين ما برحمونا
*ما تشوفوا مسكنتهم دي
*زمان
*سنة سته وتسعين
*لقونا كعبين ادونا اربعه
*الليله هم كعبين شديد
*يبقي ياخدوا اكبر عدد من الاهداف
*اصلوا ما نرفع منهم
*ايها الناس
*انه يومنا
*نقوم بواجبنا كاملا
*ثم نحتفل بعد ذلك
*يحق لنا الاحتفال
*نتصدر ونتحكر
*ونخلف رجل فوق رجل ونتصور
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الليله الصداره نايمه عندينا
سلك كهربا
ننساك كيف وكنا دايرنك الليله جمب بكري
والي لقاء
سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.