بسم الله الرحمن الرحيم
في السلك
الكارثه اخير من المصيبه  .. بقلم: بابكر سلك
*ليس الحدث ان تقابل فرقا ضعيفه
*ومغموره
*ولكن الحدث ان تجبر فرقا قوية وعريقه علي التقهقر
*ان تجبرها علي التطفيش
*ان تلزمها بالبقاء في منطقتها تسعين دقيقه
*ان تجعل الرعب يدب في قلوبهم التي لم تعرف الخوف يوما
*ان تجعلهم يحمدون الله علي خوجهم باقل الخسائر
*هذا مافعله المريخ بالترجي
*كان حدثا كبيرا
*كل افريقيا تابعته
*وادركت ان المريخ لم يدخل لوح الشرف الافريقي بالصدفه
*بي حقو
*ومن حقو
*ان يحلم بالعوده لمنصات التتويج
*ايها الناس
*بكري مكسب كبير
*وصاحب مجهود وافر
*افريقيا لعب لشعارنا ضد عزام
*فاحرز الهدف الاول من الثلاثيه
*ولعب ضد الانجولي
*صنع لكوفي الهدف الثاني
*وارتكبت معه ضربة الجزاء التي اضاعها وانغا
*ولعب ضد الترجي
*باب سويقه لي اسي برجف
*انطلق كالصاروخ وسط التوانسه
*نساهم ليك الفرنساوي زاتو
*وتسبب في الهدف الذي هزمنا به الترجي
*ارتكبت معه ضربة الجزاء
*يبقي بكري اضافه ولا ما اضافه يا ناس يا قيافه ؟؟؟
*ايها الناس
*ببساطه يمكننا ان نتخطي الترجي بهدف علولو
*لو لعبنا بحرفيه والتزام تكتيكي بتونس
*مع ملاحظة ان ازعاج بكري براهو
*بخلي التوانسه ما يندفعوا للهجوم
*وعندما تتأهل علي حساب الترجي
*ده براهو كاس
*المهم
*هلالابي كبير
*امس قبل كورة الهلال
*قلت ليهو لو دطرتوا تبقي كارثه
*ولو اتأهلتوا تبقي مصيبه
*قال لي كيف يعني ؟؟؟
*قلت ليهو الطيران من فريق جمهور ماعندو كارثه
*والتأهل للمجموعات بالمستوي ده مصيبه
*حاتكون النتائج فضائح متلتله
*ولما شاهد المباراه
*قال لي صدقت
*اسلام حضرت الكورة معانا
*قالت لي يا بابا
*الهلال لاعب ضد مريخ واو ؟
*قلت ليها ابدا يا بتي
*لاعب ضد سانغا
*قالت لي سانغا ده موش بلعب في المريخ ؟؟
*قلت ليها ابدا
*داك وانغا
*ايها الناس
*فريق مشجع ماعندو
*ناس بلدو بشجعوا ضدو
*يبقي وجيع ماعندو
*ووصلتنا معلومه بتقول
*رئيس سانغا بشجع مازيمبي
*والسكرتير بشجع فيتا
*زول بشجع الفريق مافي
*الله يسألكم
*سمعتوا بي فريق اسمو سانغا قبل اليوم ؟؟؟؟
*حلمتوا ساي بفريق اسمو سانغا ؟؟؟
*بتعرفوا زول بعرف فريق اسمو سانغا ؟؟؟
*القرعه زاتها قالت الاسم ده غريب علي
*درهم الحظ مرات بخدم شديد في القرعه
*زنزبار وفشنكات وسانغا
*اسمو سانغا وروحو مارقه
*لكن يمكن القصه دي نهايتها مصيبه
*كان اخير الكارثه
*المهم
*مشكله كبيره في الدخول لاستاد المريخ
*مباريات جماهيريه زي حقت الترجي دي
*ابواب الدخول قليله
*تسبب تأخير الدخول وتزاحم الناس
*ويضطر الناس لكسر الابواب
*فتضيع علي المريخ اموال
*ويتحمل الاستاد فوق طاقته
*ليه مانفتح منافذ دخول كتيره ومريحه ؟؟؟
*تانيا
*الناس البتنزل بعد الكورة للملعب
*وتتشعبط في الشباك والعارضه
*الناس ديل بخربوا علينا بنياتنا التحتيه
*وبضروا المريخ
*القصه دي دايره حسم
*تالتا
*الشرطه البره الاستاد دي مافي داعي ليها قدر ده
*محلها داخل الاستاد لتمنع الناس من (النط والتليب ) من الشعب لي شاخور
*ومن الشعبيه للجانبيه
*ومن شاخور للشعب
*اول امس والله في ناس نطوا وتلبوا من الرئيسيه للجانبيه
*عشان كده
*المكان المناسب للشرطه هو داخل المدرجات
*اما في تنظيم الصفوف
*فربع العدد يكفي لتنظيم الصفوف
*بالذات والقصه فيها سواري
*ايها الناس
*ان تقتل عنتر
*خير الف مرة من ان تقتل فأر
*ولو قتلت كل فئران الدنيا
*اسلام قالت لي
*انا لو محل الاتحاد الافريقي
*بطير زنزبار والرصاصات والهلال وسانغا
*الاربعه مستواهم ماقدر الترجي مثلا
*ماقدر المريخ
*ماقدر مازيمبي
*ماقدر فرق الجزائر والمغرب
*قلت ليها يا بتي
*كان اخير الكارثه
*المصيبه دي ناس فطومه اختي مابقدروا عليها
*المهم
*غرزه مدرب برتبة بروف
*وطالما قال استطيع التأهل من تونس
*يبقي مبروك التأهل علي حساب الترجي
*فقط نلعب باصرار
*ورسالة لرمضان عجب
*اظنك فكرت في حافز التسجيل
*بقيت خايف من الاصابه
*عشان كده مستواك نزل
*لكن ما تنسي يارمضان
*نزلت المستوي بتنزل الحافز برضو
*وبتقلل الطلب في السوق
*اصحي يا رمضان
*ايها الناس
*اعترف التوانسه بعلو كعبنا
*الشفت عبدالله بني
*من داخل الاستاد
*سمع محادثة تلفونيه بين صحفي تونسي كان يجلس جواره
*مع صحيفته بتونس
*قال بالحرف الواحد
*المباراه من طرف واحد والله يستر
*الفريق السوداني خطير
*والجماهير مرعبه
*وعلي صفحتهم بالفيس
*واحد ترجاوي كاتب
*عمري ما كرهت زوز اشخاص قدر بكر المدينه والمعلق السوداني
*بكري المدينه يا ترجاوي هنا في ناس موش بكرهوهوا
*ممكن يموتوا لو ضمنوا بكري يموت معاهم قبل يرفع جويه مع المريخ
*الله يحفظك يا مدينه
*ياهجوم بحالو
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*الانتخابات انتهت
*هل ستظل الشعارات مجرد شعارات
*ام ستنسوها مع الاحتفالات
*ام ستنزلونها الينا علي ارض الواقع تخرجنا من الازمات ؟؟؟؟؟
*ولا نرجي اربعه سنين تاني يا والينا ؟؟؟؟؟
سلك كهربا
ننساك كيف وسانغا كنغلي بعرفو مافي
والي لقاء
سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.