بسم الله الرحمن الرحيم
في السلك

*ايها الناس
*تعالوا نستغل سقوط المنتخب في فتح ملف الرياضه كلها
*كل المناشط نسأل عنها
*نفحصها منشطا منشطا
*ونسأل انفسنا بوضوح
*ونجاوب بصراحه
*بعيدا عن اي تعليق علي شماعة الامكانات
*فنحن في دولة رصفت شريان الشمال في شهرين
*وصبت سد مروي في تلاته شهور
*وتنفق علي الانتخابات مليارات
*وعلي الاحتفالات مثلها
*ويستمتع دستوريوها باللاند كروزرات موديل الفين واربعطاشر
*دوله اللاندكروزرات فيها اكتر من عدد المواطنين
*يبقي لا محل للتعلل بالامكانيات الحكوميه
*دولة تقف علي مليارات متلتله
*يبقي نصيب الرياضه من تلك المليارات المتلتله مفروض يكون باين
*وظاهر في مستوانا في شتي المناشط
*وفي مشاركاتنا الدوليه
*غير كده
*يبقي نصيب الرياضه غير باين
*ويمكن غير موجود اساسا
*زمان لما البترول طلع
*البلد كلها هللت
*خالتي بعد صلت الضهر بالليل حاضر
*بعد تركيب كشافات المريخ الجديده
*سمعتنا بنتكلم عن استخراج البترول
*قالت البترول طلع ؟
*قلنا ليها طلع يا خالتي
*قالت لينا ما طلع
*قلنا ليها شوفي الجرايد
*طلع ونص وخمسه
*قالت طلع في الجرايد يبقي ما طلع
*قلنا ليها كيف ما طلع ؟؟؟
*قالت بترولا ما شفناهو في صينية اكلنا دي  يبقي ما طلع
*في اللحظه دي تمرين المريخ انتهي
*طفوا الكشافات
*خالتي صلت العشا حاااااضر
*ايها الناس
*ميزانية رياضه ماشفناها في مشاركات كل المناشط دوليا
*وما شفناها في مستوانا الرياضي
*يبقي ما طلعت
*ايها الناس
*اين سلة السودان الآن
*من سلتنا ايام وليام اندريه والاعيسر ؟؟؟
*ايام كنا نتواجد علي طول علي منصات التتويج الافريقيه والعربيه
*اين سباحتنا اليوم
*من سباحتنا ايام كيجاب وممدوح وساره جادالله
*حيث كنا نتواجد دوليا فيها
*وجواز كيجاب الكندي كان هنديه من الرئيس الكندي لكيجاب
*لانه اول اسمر في العالم يعبر سباحة فوق الثلوج
*اين خليفه عمر والكشيف وغيرهم
*الآن بصيص اشراق لكاكي وكفي
*اين الرياضه العسكريه من المشاركات الدوليه
*اين واين واين
*اين مي
*يا مي
*ايها الناس
*لن نبكي علي الماضي لنلطم الخدود
*ولن نبكي علي اللبن المسكوب
*ولم نذكر الماضي كي نسقط الهمم
*ولكن نرجع للماضي لنقارن بين حالين
*لنعرف اين نقف اليوم
*واين كنا نقف بالامس
*ووين يجب ان نقف في المستقبل
*انها دراسات واستراتيجيات تقوم علي اسس مدروسه ومنهجيه
*انها الصدق مع النفس وخوف  من الله تعالي في هذا الشعب الطيب
*انها المسؤليه وحب الوطن
*ونذر الذات للبلد ولاهل البلد
*لاتعني باي حال نذر البلد واهل البلد للذات
*ايها الناس
*اصبحنا اطلال
*وذكريات
*سقط بعضها بالنسيان
*وضاع بعضها الآخر بالتوهان
*وفقد قيمتها الانسان
*انسان !!!
*اين هو الانسان ؟؟؟؟
*هل الانسان هو من يهمل في مسؤلياته تجاه منصبه ووظيفته ووطنه ؟؟؟
*ام ان الانسان هو من يسكت علي اهمال اخيه الانسان لمسؤلياته  تجاه منصبه ووظيفته ووطنه !!!
*اجماع سكوتي ؟؟؟
*اين نحن من وجع الوطن ؟؟
*واين الوطن من احساسنا بالوجع تجاهه ؟؟؟
*واين الوجع ؟؟
*الوجع هنا ؟
*طيب هنا في وجع ؟؟
*وهنا كيف ؟؟
*في وجع هنا ؟؟؟
*شيل نفس
*انفخ بطنك
*شيل نفس تاني ؟؟؟
*كان شلت التالت بتدفع رسوم بعد ده
*رسوم النفس الطالع ونازل ده
*ايها الناس
*اين الوعي بالاشياء
*اين التفاعل مع الامور
*اين الوجع ؟؟؟؟؟
*المهم
*طال ما بعضنا لسه بستخف ببطولات لم يستطيع ان ينالها
*يبقي لسه نحنا بعيدين
*لسه في الصفر
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*عاجبك البحصل فينا ؟؟؟
سلك كهربا
ننساك كيف وامكاناتنا بقت خرافه زي البعاتي وام بعلو
والي لقاء
سلك

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
////////