بسم الله الرحمن الرحيم
*نحمد الله
*جوياتنا كتيره جدا
*برغم انها تزيد علينا حسادة الحساد
*الا ان الحساده لاتغير من الواقع شئ
*من شر حاسد اذا حسد
*رايكم شنو في الحاسد الحسد  اذا حسب
*اذا الحاسد حسب
*حايلقاها كتيره
*يقوم يحسد من جديد
*والمريخ يحصد من جديد
*ايها الناس
*اذا غمدت ودخلت ايدك في نادي المريخ
*اكيد ايدك يا لمست سيكافا الاولي
*يا هبشت مانديلا
*يا وجدت دبي
*يا لمست سيكافا التانيه
*يا لامست الشارقه
*يا خمشت جوبا
*يا لمست سيكافا التالته
*محل ما تخت ايدك تحمد سيدك
*اما اذا ادخلت ايدك في نادي جماعه كده
*اعمل حسابك من الدبيب والعقرب
*اصلو الدبيب والعقرب بسكنن في الخلا
*وهل يوجد خلا اكتر من الصفر الدولي ؟؟؟
*ايها الناس
*ملاحظين
*امجاد ممنوع تدخل المطار
*ما بتخش المطار نهائي
*وكذا الهلال ماشفناهوا في المطار
*امجاد والهلال ما بدخلوا المطار
*داماس يا عمك
*ده قرار
*وحايستمر هذا القرار
*والماعاجبو
*يجيب شئ يدخلو المطار
*انا خايف امجاد تجيب كاس
*وتيم روشا لسه يكون محتاس
*ايها الناس
*كأس السوبر الافريقي اكبر من كأس ابطال افريقيا
*وكأس ابطال افريقيا اكبر من كأس الكونفدراليه
*وكأس الكونفدراليه اكبر من كأس سيكافا
*وكأس سيكافا اكيد اكبر من الصفر
*يا كبار دي فاهمنها ؟؟؟
*المهم
*كترت حجج الصفراب
*وماعارفين يقولوا شنو
*لكن حكايتهم دي 
*زي الطالب الامتحن الشهاده
*اصحابوا دخلوا صيدله وزراعه
*قال لأ 
*هو ما بدخل الا طب
*وبقي يعيد
*كلو سنه يعيد
*مرات بقد عربي
*ومرات بقد رياضيات لانو بحسبها غلط
*كلما يعيد
*اصحابو يكونوا مشو في الصيدله والزراعه لي قدام
*اتخرجوا وهو لسه بعيد
*فتحوا صيدلياتهم ودوروا مزارعهم
*وصاحبنا لسه بعيد
*ادمن التربيت
*قال يا طب يا بلاش
*آخرتها حايفرش نبق جمب الصيدليه بره
*اصحابو عاد
*مابقدروا يطردوهوا
*ويقعد يكورك
*النبق النبق النبق
*ماقلت طب !!!
*ايها الناس
*اتحاد سيكافا قرر يعمل بطوله يسميها سيكافا جدا
*ودي بشارك فيها بس الفرق الفازت بي سيكافا تلاته مرات كحد ادني
*وحايخلي سيكافا دي للفرق الشالت سيكافا مرتين كحد ادني
*وحايعمل بطوله جديده اسمها سيكافا بامبرز
*دي بشارك فيها الجماعه الرصيدهم صفر في سيكافا وسيكافا ماغصاهم
*عشان كده سيكافا بامبرز انسب ليهم
*المغصه دي مامضمونه
*واتمغصي
*المهم
*واحد هلالابي قال لي كان جبتوا كاس العالم زاتو نحنا اسياد البلد
*قلت ليهو ذكرتني اهلنا في دارفور
*طبعا افضل زول بقول مثل هم اهل دارفور
*ناس خبراتهم في الحياه كبيره
*ناس قدام شديد
*ليهم معرفه ودرايه وحكمه
*قالوا مثل جميل ينطبق علي الهلال
*المثل بقول
*كليكلا شيخ بلا حله
*فما ممكن تكون سيد بلد وانت ما قدمت حاجه للبلد
*البلد اسيادها رجالا غابوا وجابوا
*المهم
*يظل الانجاز اعجاز يخليك محل ماتخت ايدك تحمد سيدك
*ويظل الصفر صفرا يجبرك  محل ماتخت ايدك تعمل حساب ايدك من الدبيب والعقرب
*كليكله شيخ بلا حله
*اين هي حلة كليكله عشان يبقي شيخها ؟؟
*قال اسياد قال
*الاسياد سيادتهم اعلنها القصر الجمهوري قبل تمنيه وعشرين سنه
*سنة سته وتمنين 
*لما كرمهم القصر الجمهور بوسام الانجاز والاعجاز
*وكان القول
*السيد حامد بريمه
*السيد كمال عبدالغني
*السيد عاطف القوز 
*السيد عيسي صباح الخير
*السيد حسن دحدوح
*السيد ابراهيم عطا
*السيد صديق العمده
*السيد جمال ابو عنجه
*السيد سامي عزالدين
*ازيدكم ولا كفاكم ؟
*ديل الساده
*وساده بي مرسوم جمهوري
*يبقي العندو مرسوم جمهوري بثبت انو سيد يجيبو لينا
*كليكله ما بنفع بلا حله
*كليكله لازم محل ما تخت ايدك تحمد الله
*موش تقعد كليكله نقه ساي بدون حله 
*ونواصل
*السيد ابراهومه المسعوديه
*السيد بدر الدين بخيت
*السيد عصام الدحيش
*كفاكم 
*باقي كشف الساده الدايروا يقدم طلب
*ايها الناس
*الداير يدخل طب ما بقد عربي كلو سنه
*لما امتحن اول مره البلد دي فيها طب الخرطوم بس
*اسي كليات الطب اكتر من المرض زاتو
*وصاحبنا لسه بربت
*بقد عربي
*والله انا من شفت ساقين سامي عبدالله
*عرفتكم قادين عربي
*ايها الناس
*جمال عرف درب الجويات
*المطار ده بعد كده الا يتوسع
*جاياكم بلاوي
*امجاد ما بتدخل المطار
*هذا لللتذكير
*امجاد تحاحي بي بره ساي
*لكن تشوف طياره
*ده بعدها
*امجاد تقعد جمب جاد لو عملت ليها امجاد تدخل المطار 
*كليكله 
*ما تبخس اشياء الناس
*اول سوي ليك حله
*وقبل الحله سوي ليك شعار
*عصمت ده فتر منكم
*ياخ خليها يا كلكله حكاية الشعر والحله
*سوي ليك بستله
*بنعتبرها ليك اذن يدخلك المطار
*كليكله
*هييييييييييييييييييييع
*كليكله
*المهم
*من يبحث عن امجاد حايقعد مع امجاد بره المطار لما يلقي امجاد
*يقعد بره مع امجاد جمب جاد لمن يعمل امجاد يدخل المطار من جاد
*ولو المحل مليان 
*جمب امواج
*بره بره 
*بره وبعيد
*يا جمب امواج يا جمب جاد
*اها
*اهلنا في بربر بقولوا للشحم المطبق في الرقبه فرطله
*تلقي الرقبه مطبقه ماشائ الله زي السرابات في الجروف
*والنعامه طبعا رقبتها ريشه مافيها
*رقبة ميطي ولملط
*وبالتأكيد ماعندها فرطله
*لانو لوجاتها فرطله في رقبتها الزي المصران دي
*رقبتها بتتكسر
*وبتموت
*لكن النعامه مشهوره بانها بتدفن رقبتها عشان ما تشوف
*وبتفتكر الناس ما شايفنها
*عشان تنكر الاحداث الاتغابت في شوفها
*لذا 
*اب زرد ابو فرطله كلو يوم يزيد في فرطلتو
*رقبتنا زاتنا وجعتنا من ردم الفرطلات فيها
*والنعامه لسه نعامه
*ماعندها فرطله
*وتدفن راسها  عشان ما تشوف الفرطله
*ودفن الرأس في الرمال ما بنفي وجود الفرطله علي عنق اب ا زرد
*ادفني ساي يا اختي
*ورقبة النعامه ما بتتحمل فرطله
*لو قامت ليها فرطله
*يبقي الدائم الله
*حاتنكسر ررررررج
*الفرطله تقيله
*سنام داير ليهو رقبه
*فيا عشاق النعام
*كي لاتموت نعامتكم
*ما تجروا خلف فرطله تكسر رقبة النعامه وتقعدوا في الندامه
*خلوها كده
*كلما تشوف فرطله
*تدفن راسها في رمال الحله
* وتعمل فيها ما شايفه 
*المهم
*تهنئه من مريخاب كنور للزعيم
*بقيادة الزعيم عبدالله الطاش
*ومريخاب كنور شفوت بي فرطلاتهم يحمدوا الله
*ولهم التهنئه
*روشا كليكله وفطومه اختي كليكلايه ومبارك البلال كليكله كبير ومحمد عبدالماجد حفظه الله ورعاه كليكله لي بهناك
*حقوا يسموكم الكلاكله
*يا كليكلات
*كلاكيت تسعه وتمنين مره
*المهم
*التحيه للشفت ياسر محمد نور من شرطة تأمين التعدين
*وحقوا يا ياسر تأمنوا لينا مريخنا ده
*احسن جهاز كشف دهب في العالم
*والتحيه موصوله للصديق ايهاب بر بالضرائب
*رغم زرقته الا انه ما كليكله
*يعترف لنا بالانجاز ويحتفل معنا بالكاس
*ايها الناس
*ان تنصروا الله ينصركم
*اها
*نجي لي شمارات والي الخرتوم
*يا والينا
*علي العلينا
*كمان بقي حق البفباف علينا ؟؟؟
*خمسطاشر الف يوميا كتيره  يا والينا
*وحق رش الباعوضه مدفوع في العوائد ومضمن لينا
*يبقي ليه للبفباف تشرينا ؟؟؟
*وبعدين يا والينا
*المبيد بقي يعطسنا ويضايقنا ويبكينا
*والباعوض برضو حايم فينا
*الجوده والمواصفات فحصت المبيد ده لينا ؟؟؟؟؟
سلك كهربا
ننساك كيف والمبيد بقي يضايقنا في نفسنا وحماية المستهلك ماجايبه خبرنا
والي لقاء
سلك
عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.