بسم الله الرحمن الرحيم
في السلك
*بحمد الله زينا جيدنا بانجازات جويه لا تحصي
*وغيرنا رقبتو زي رقبة النعامه
*ريشه مافيها
*ورغم ذلك يمشي مختالا
*مفروض يمشي محتارا
*لكن تقول شنو
*ايها الناس
*رقبة النعامه طبعا لاحقه راسي ده
*ريشه مافيها
*ورقييييييقه
*والبشوف صلعة النعامه يقول فيها فرطله 
*والنعامه لو عملت ليها فرطله بتكسر رقبتها
*والفرطله حسب قول اهلنا في بربر
*هي الكرفسه بتاعت الشحم في الرقبه
*وترمز للصحه والراحه
*زول معلوف شديد
*تلقي رقبتو مخططه بالعرض زي كراس العربي
*اوكورديون بس
*دهن يا عمك
*والراس بكون صلعه تلمع
*الفرطله زاتها جمالها بظهر مع الصلعه الجامده
*وتكتنز الشحوم واللحوم في الفرطله
*تميز صاحبها عن بقية الرجال
*زي سنكيت التور
*التور الماكن بتلقي سنكيتو ليهو ضل
*يتأرجح مع قدلة التور اب جاعوره
*مرتااااااااح
*وبخت لحم صاح
*اها
*الفرطله بهذا المعني لو قامت للنعامه في رقبتها
*اكيد بتكسرها ليها
*رقبة زي المصران
*مابتشيل ليها شحم قدر ده
*عشان كده اهلنا عشاق النعام
*حقو يقبلوا بي نعامتهم دي بدون فرطله
*علي الاقل عشان تعيش
*لانو لو قامت للنعامه فرطله
*حايبقي ده يوم شكرها
*ولذا افضل للنعام ان يدفن رقبتو في الرمل
*ويعمل ماشايف
*يعمل لا شاف المطار ولا عظمة الانتصار
*يتغابي العرفه في فرطلات اب سنام
*فكلما تغابت النعامه ودفت رأسها كي لاتري الانجاز
*ردم اب زرد لفرطلته طابق جديد
*لذا تبقي الفرطله علي رقبة اب زرد  واقعا يعبر عن تميزه 
*وتبقي النعامه تتدفن رأسها في الرمال كي لاتري طوابق الفرطله الجديده
*فالنعامه نعامه والفرطله فرطله واب زرد اب زرد
*اللهم انعم علينا براحة تزيد فرطلتنا كل يوم يا رب العالمين
*اللهم وحافظ علي النعامه ام رقبة رقيقه ودلجه بعدم قيام فرطله علي رقبتها عشان رقبتها ما تنكسر يا رب العالمين
*اللهم ان كترت علينا الفرطلات اعطنا رقبة قويه تشيلها كلها يا رب العالمين
*اللهم وكتر الرمال للنعامه لانها حاتدفن راسها كتير يا رب العالمين
*المهم
*تهنئه من مريخاب كنور بقيادة الزعيم عبدالله الطاش لمريخ الفرطله
*كنور المدينه وكنور الحله
*كلهم ليهم فرطله
*وبعشقوا نادي الفرطله
*ويتمنوا زيادة الفرطله
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الباعوض بقي مابموت لينا
*ترك في طفلا لينا
*نضربها طااااااخ يا والينا
*نلقاها زاغت ولبعنا طفلنا بي ايدينا
*نفكها ليك بي شبشب يا والينا
*تزوغ نكسر اوانينا
*ومن تمغرب الواطه يا والينا
*البلد كلها تصفق يا والينا
*نيني نيني نين تجينا
*نسكها بي ايدنا
*نحاول قتلها يا والينا
*نلقي روحنا بنصفق ليها يا والينا
*نصفق للباعوضه الغلبت حكومه كامله مسيطره علينا
*اريتنا كان باعوض يا والينا
*عشان نجبركم تصفقوا لينا
سلك كهربا
ننساك كيف ولما تلقي زول بصفق بكون معجب بي باعوضه
والي لقاء
سلك
عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
///////////