بسم الله الرحمن الرحيم
في السلك

babikir maki [عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.]
•    موضوع كادوقلي انتهي
•    مين البعدو ؟
•    تبقت اربعه مباريات
•    الفرق الاربعه الحانقابلها لو عملت منها منتخب حاتأخد المعلوم
•    الاربعه مجتمعه في الدوره الاولي احرزنا فيها تسعه اهداف
•    اربعه في النسور
•    واربعه في الخرطوم
•    وواحد في الزبون
•    وهي احرزت فينا هدفين
•    واحد حق النسور
•    وواحد حق الاهلي
•    ولاعزاء للزبون
•    واخدنا منها تسعه نقاط من اطناشر
•    اسي قررنا نأخد الاطناشر نقطه من اطناشر
•    المهم
•    ايدكو بالغ
•    عليكم الله اسي الغلط تسجيل اديكو ولا الغلط تسجيل كنج كونج  ده ؟؟؟؟؟
•    قاعد عاله في النقاله
•    السنه كلها مصاب
•    زول مابلعب وبتصاب
•    اصيب وين ؟؟؟؟
•    صابتو عين يا ربي !!!!!
•    اها
•    ساكواها امس عمل طمنطاشر
•    يعني عليها تمانيه في الاربعه مباريات الجايات
•    بمعدل هدفين في المباراه
•    يكون وصل للرقم سته وعشرين
•    فات كليتشي وطمبل
•    وفات الكبار والقدرو
•    هييييييييييييييييييييع
•    اديكو اب راس
•    عفيت منك
•    وكلنا راضيين عنك
•    لانك
•    تسجيلك غلط !!!
•    اتغلطي
•    المهم
•    بعد الكوره بنتونس بيها
•    كنا قاعدين في المستشفي
•    مع الحاجه
•    خالتي جات تزور اختها
•    سمعتنا بنتكلم عن يس
•    وقلنا اسي يس مالو ؟؟؟؟
•    قالت يس ده منو ؟
•    قلنا ليها يس ده قونا لينا
•    قالت كان وين من زمان ؟
•    قلنا ليها كان قاعد مركون بدون سبب
•    قالت والحلبي ماجا ؟؟؟؟
•    قلت في سري خالتي دي بتطربق في الكلام كده اظنها ما بلعت الحبه الليله
•    باقي هي عندها الضغط
•    واتلفت عليها
•    قلت ليها حلبي شنو يا خاله !!!! اسمو الحضري ما الحلبي
•    اسلام ضحكت لما امي صحت من النوم
•    اها
•    الليله داير احكي ليكم قصة ود كشه
•    عبدالله كشه مريخابي كبيييييييييييييييير
•    وقدييييييييييييييييييييييييييييييييييييم
•    شغال في بنك الخرطوم فرع مدني
•    عندو ولد شليق خلاص
•    الولد شاكل ولد تاني في المدرسه
•    قام ود كشه عضه الولد التاني في اضانو لما الولد التاني عرف حاجه
•    المشكله وصلت لادارة المدرسه
•    الناظر ناداهم الاتنين
•    شاف اضان الولد معضوضه شديد
•    اتلفت علي ود كشه
•    وقال ليهو عاضي زميلك في اضانو لما داير تقطعها ليهو ليه ؟
•    ود كشه قال للناظر والله ماكنت شايفها
•    تخيلوا
•    عضاهو في اضانو وقال ماشايفها
•    اصبروا ياناس !!!!!!
•    الضرب الحكم اتعرف ولا كشه ؟؟؟؟
•    اقصد الضرب الحكم اتعرف ولا لسه ؟؟؟؟؟؟؟؟؟
•    الدنيا دي غايتو فيها جنس قصص
•    اسكت بس
•    ايها الناس
•    اليومين دي ماعارف بتذكر غزوة الخندق طوالي ليه
•    اللهم اجعلو خير
•    المهم
•    واحد من اهلنا الرباطاب قطيم شديد
•    عندو كشك
•    اليوم داك قرر يصين الكشك
•    طلع الحاجات بره
•    وغسل الكشك
•    ومشي جاب ليهو بوهيه وفرشه
•    وزبط ليك الكشك زبطه صاح
•    واحد تاني
•    رباطابي اربط من الاول 
•    جابو الدرب
•    سالم الرباطابي
•    باقي بتعارفو
•    وقال للرباطابي كشكك ده ضربتو بوهيه ؟؟؟؟؟
•    الرباطابي الاول  قال ليهو لا ضربتو بونيه
•    الرباطابي التاني قال ليهو عاد  بعدين  ماتنكر
•    ايسكوتي ايسكوتي
•    ميش الحضري قال عايز فلوس من المريخ ؟ وقال ايه رايح يشتكي المريخ !!! شفت يامه الحاجه ؟؟؟؟؟
•    ايسكوتي يا بت ؟ لو كان البتكلم مجنون يبقي اللبتسنط عاقل , ولا ايه يا بت ؟؟؟؟
•    صاح يمه الحاجه
•    ايها الناس
•    اخطأ الحضري في حق المريخ
•    وشاركه في ذلك مجلس الاداره
•    وبعض قادة الرأي فينا
•    وبعض الجماهير
•    اي زول كان بشوف الممتاز اهم من كرامة المريخ شارك في مهزلة الحضري
•    ولا اظن ان واحد من الناس ديل حاينكر
•    نحنا مريخاب والنكران حاشانا
•    ايها الناس
•    هناك رساله من المريخاب الحمر تقول
•    ياحضري
•    اضرب راسك في الحيط او روح القيط ومننا ابدا ما بتحله القيد
•    ايها الناس
•    اخاف بعد ده كلو الحضري يتضبلن من جديد
•    ونرجع نقول قبلنا الاعتذار
•    لن نقبل الاعتذار
•    ولا عبنا حتي الاعتزال
•    نوديك الكنبه
•    نختك بره الطمنطاشر
•    نوديك المخزن
•    نحولك جزيرة الفيل
•    نحنا حرين جدا
•    واعلي مافي خيلك اركبو
•    وجيب معاك جمل ميدان التحرير كمان
•    وبرضو ما بحلك
•    بره كلام فارغ
•    اها
•    عاودت الحبيبه السوبر الصدور
•    واكتست كعادتها القا وبريقا
•    حمدالله الف علي السلامه
•    ايها الناس
•    ست الحبايب تنتظر دعواتكم
•    اليوم جمعه
•    والامه مجتمعه
•    والدعوات مقبولات باذن الله
•    ماتنسوها
سلك كهربا
ننساك كيف وكلما مانشوف ايدكو نقعد نبكي من جديد
والي لقاء
سلك