بسم الله الرحمن الرحيم
في السلك

•    ازيكم
•    لسه بنتقابل بالتقطيع
•    ست الحبايب محتاجه لمزيد من ابتهالاتكم
•    وانتم لاتبخلون
•    بدت تتحسن بفضل قبول الله لابتهالاتكم
•    مزيدا منها لنطرد المرض اللعين
•    كلكم
•    كل مجتمع الرياضه السمح المتسامح
•    مريخاب هلالاب مورداب املاب عطبروايين
•    ناس كتور جوبا عفيناهم
•    المهم
•    يعني ناس القطن لو شدوا حيلهم حبه
•    او ناس انيمبا لو رخوا الحيل شويه
•    او ناس انيمبا لو لعبوا الشفع لانهم ضمونوا الصعود
•    يعملوا زي ناس طيب الذكر مازيمبي
•    يلعبوا ناس الجمهور مابعرفهم
•    واحد من جمهور انيمبا في كورة القطن يسأل واحد من آخر من جمهور انيمبا
•    يقول ليهو ناموري  رابوعي باتوعي  مانوي
•    يعني نمره اربعه  بتاعنا ده منو ؟
•    يرد عليو شابولي اسومي قاووري
•    يقول ليهو ده شافع اسمو قورو
•    وهذا بقية تشكيلة انيمبا لي مباراة القطن
•    ناس انيمبا مابفرطوا في لعيبتهم الاساسيين
•    وناس القطن مابفوتوا الفرصه دي
•    ولو القطن استقله الفرصه دي حايصعد مع انيمبا
•    ولو القطن رافق انيمبا الي دور الاربعه
•    يبقي الرجاء عدم اصطحاب الاطفال
•    المهم
•    وصلتني رساله في التلفون
•    بتقول اي شئ في البلد دي زاد الا نقاط سيد البلد
•    ياصاحب الرساله
•    سيد البلد الحمد لله نقاطو زايده
•    اول امس دي شايل تلاته جرادل من الحصاحيصا
•    كوس النقاطو ما بتزيد
•    اسلام قالت لي الهزيمه في رمضان بتفطر
•    قلت ليها هناك خلاف في ذلك او كما قال
•    ايها الناس
•    بالامس شفت في الصحف  صوره لتكريم الفريق القومي عند ناس الامن
•    فيها كل اللاعبين بالبدله الرياضيه الخاصه بالفريق القومي والحذاء
•    الا لاعبين
•    احدهما يلبس شبط مع البدله الرياضيه
•    والآخر يلبس الجينز وتي شيرت
•    الاول قلق
•    والتاني مصعب
•    فهل عدم الانضباط في المريخ هو السبب في ظهورهما بهذه الصوره السيئه ؟؟؟؟؟
•    صبرا آل ياسر
•    شهر اطناشر قرب
•    المهم
•    وانا مشغول مع مرض الوالده سمعت عن قرارات مجلس الصحافه
•    وقريت عنها
•    لكن مافضيت ليها
•    لفت نظري انهم قالوا ان السيد مروح قال ان المجتمع السوداني عاني  كثيرا من انفلات الصحافه الرياضيه
•    الرأي عندي
•    يجب ان تموت الصحافه الرياضيه طالما يعاني منها المجتمع السوداني
•    فمن المعروف ان المجتمع السوداني بحمد الله مجتمع لا يعرف معني المعاناه
•    ولاشافها بي عينو
•    ولذا يمكن ان يموت اذا عاني من الصحافه الرياضيه
•    ولذا يجب قتل الصحافه الرياضيه حتي لا تقتل المجتمع السوداني الذي لا يعرف المعاناه
•    فهو مجتمع لم يعاني في تعليم ابنائه
•    ولم يعاني في العلاج
•    حيث ترسل وزارة الصحه بكاسي اخر موديل تجوب الاحياء بها مكبرات للصوت تنادي علي المجتمع السوداني حتي يركب وتذهب به للمستوصفات الخاصه الفارهه ليعمل فحوصات دوريه مجانيه حفاظا علي صحته
•    الصحافه الرياضيه يجب ان تقتل الآن
•    لان المجتمع السوداني يعاني منها
•    وهو المجتمع الذي لم يعاني من سعر كيلو الطماطم الذي لم يصل الي خمسه وعشرين الف جنيه
•    ولم يعاني من سعر كيلو زيت المكنه الذي وصل خمسة عشر الف جنيه
•    لان المجتمع السوداني الواعي يعلم ان كيلو الزيت ابو خمسطاشر الف هو كيلو زيت بدون عضم
•    الصحافه الرياضيه طالما يعاني منها المجتمع السوداني يجب ان تموت فورا
•    لان المجتمع السوداني لم يعرف معاناة ابناه من الخريجين والعطاله
•    حيث يتم تعين الطالب في وظيفه محترمه وهو في سنه تانيه في الجامعه
•    ولان المجتمع السوداني لم يعاني من فرط الدهشه التي الجمته من الصنقيع يوميا لمشاهدت عماره جديده قامت
•    كانها نظزلت من السماء ليلا
•    والمجتمع السوداني يبحث عن حفنة تراب رقيطا عشان يكبها تحت السبلوقه
•    لم يعاني من ذلك
•    ولم يعاني من لفظ كتب في الصحافه غير الرياضيه لم يتجرأ احد في العالم علي كتابته عند وصف عدم قدرة المعارضه علي الاتفاق
•    ولذا لم يسأل المجلس عن ذلك اللفظ
•    انا لن اكتب اللفظ خوفا من معاناة المجتمع السوداني الذي لم يعاني حتي الآن
•    الصحافه الرياضيه يجب ان تموت فورا
•    طالما كانت هي المعاناه الوحيده للمجتمع السوداني الذي لا يعرف معني المعاناه
•    اسلام قالت لي معاناه يعني شنو ؟؟؟؟
•    خشي جوه يابت
•    اها
•    قالوا الحضري قال ماجاي
•    قال مروح
•    والشعب يقول روح يا مروح
•    قطر عجيب
•    مجالات اللقاءات والتلاقي كثيره
•    ليست حصرا علي الورق
•    فالوسائط كتيره
سلك كهربا
ننساك كيف ويمكن تلاقينا يبقي في الفيس بس
والي لقاء
سلك

babikir maki <عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.>