بسم الله الرحمن الرحيم
في السلك

•    امس شفتوا القمر !
•    خسوف شديد
•    اسلام قالت لي يابابا شوف القمر
•    قلت ليها شايفك
•    قالت لي قصدي القمره الفي السماء
•    قلت ليها شايفها
•    قالت لي الفيها ده شنو ؟
•    قلت ليها ده الخسوف , يعني ضل الارض
•    ضحكت
•    وقالت لي ضل الارض ولا ضل كنج كونج
•    ضحكت معاها
•    قلت ليها كنج كونج ده صعب شديد
•    زول عندو تلاته وكلاء لاعبين
•    وضلو قفل القمر كلو
•    يعني لو بشه شاتها ماشه القون
•    تدق في ضهر كنج كونج وتمرق
•    زول قفل القمر كامل
•    مايقفل هلال !!!!
•    ابتسمت
•    لما وجناتها ظهرت
•    قلت ليها عاد يابتي لو الجماعه بعد الدعم الملياري ده ماعملوا شئ تبقي كارثه
•    قالت لي الليله القمر خسوف وبكره كسوف
•    قلت ليها الكسوف ده بتاع الشمس
•    قالت لي بتاع القمر
•    قلت ليها بتاع الشمس
•    قالت لي بتاع القمر لو قروش الدوله ضاعت وماجابت نتيجه
•    قلت ليها فعلا يابتي الليله خسوف وبكره كسوف
•    شقاوتك شقاوه يا القمر
•    ايها الناس
•    الشطب الخاطئ
•    اصابة سفاري
•    النقص في المدافعين
•    موش ممكن تكون كلها اسباب للنجاح !!
•    اوريكم كيف
•    لو البدري مدرب شاطر بقدر يكتشف ويوظف لينا مدافع فلته
•    المدافع ذاتو مابكون عارف روحو مدافع فلته
•    كمال عبدالغني كان طرف شمال
•    ابدع في الظهير الثالث
•    عاطف القوز كان مهاجما
•    ابدع في الطرف الشمال
•    سامي عزالدين كان حارس مرمي
•    ابدع في الوسط
•    حامد بريمه كان جناح
•    حير المرمي ذاتو
•    انها مسألة اكتشاف وتوظيف سليم
•    البدري
•    ورينا مهارتك
•    ياناس
•    المدافع المتاخر هو شنو ؟
•    طول وقوه وذكاء وسرعه ولعب بالشمال واليمين واجادة الرأسيات
•    بعد كده اقولوا ليكم عديل يعني ؟؟؟
•    مابكلمكم عشان البدري مايسرق الفكره
•    خشمكم خفيف
•    كان كلمتكم بتكلموا البدري
•    لكن لما يعجز بكلمكم
•    ايها الناس
•    رؤوس كثيره بدأت تطل علي ساحات شباب من اجل المريخ
•    منها من يرصد
•    ومنها من يحاول ان يستقطب
•    ومنها من يحاول ان يسيطر
•    ايتها الرؤوس
•    ماتضيعي وكتك ساي
•    شباب اتوا بالفكره
•    مابتغلبهم ادارة فكرتهم
•    من اراد ان يدعم الفكره مرحبا به
•    ومن اراد ان يستقطب العقول
•    هيهات يا بشوات
•    اركبوا معنا قبل ان يفوتكم آخر قطار
•    ايها الناس
•    الحبيب الرائع جعفر سليمان لديه قصه رائعه وحقيقيه
•    كان يجلس امام التلفاز هو وابنه الصغير
•    ابنه يتابع في مسلسل لولو الصغيره
•    بدأ بينهما حوار
•    وتواصل الحوار الي ان قال استاذ جعفر لابنه
•    كنا بنحضر لولو الصغيره دي لما كنا قدركم يا ولدي
•    الابن ضحك وقال : لولو دي ماكبرت من زمن انتوا كنتوا صغار يابابا ؟
•    ابتسم استاذ جعفر
•    وواصل ابنه : يعني لولو مشكلتها مع الصغر زي مشكلة الهلال مع الصفر, صفه مابتروح؟؟
•    هنا لم يستطع استاذنا جعفر السيطره علي نفسه وضحك لمن وقع علي قفاه
•    وضحك معه وعليه ابنه الصغير
•    ضحكتوا الصغار والقدرو
•    استاذنا جعفر كتب ان الهلالاب جنهم كلمة دولي
•    وآخر ماوصلوا له انهم جابوا قطب جديد اسمه الدولي
•    وجعفر كتب انه لا يستبعد اذا روس الرشيد عموده باسم الرشيد علي دول
•    يا استاذ جعفر
•    لو خلوا كلمة دولي دي اكيد حايخلوا معاها الصفر الدولي
•    تتجازي يامزمل
•    ولو خليناهم يرددوا دولي دولي
•    اصغر عضو عندهم حايكون احمد دوله
•    اتدولي
•    نبشركم بيوم ثقافي جميل من اعداد واخراج شباب من اجل المريخ
•    بدار النادي
•    نهاية هذا الشهر
•    البغني مريخابي
•    والبصفق مريخابي
•    والجمهور مريخابي
•    والبعزف مريخابي
•    والشاعر مريخابي
•    والممثل مريخابي
•    والساوند ذاتو مريخابي
•    انه يوم الفنون الشعبيه لجمهورية المريخ الديمقراطيه
•    شباب مريخ يا
•    شباب مريخ يا
•    شباب مريخ
•    يعيش يعيش يعيش
سلك كهربا
ننسي كيف وارتريا فيها بركان
والي لقاء
سلك
babikir maki [عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.]