بسم الله الرحمن الرحيم
في السلك

babikir maki [عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.]
امس العشم كان في الفريق الاولمبي اكتر من كده
لكن من شتبه اباه ماظلم
جونا اولاد الاولمبي بنفس طريقة لعب ابوهم الكبير
الاطراف وحارس المرمي يقيفوا في محلاتهم
كان القيامه قامت ما يتحركوا
اربعه في الوسط
اتنين مهاجمين
واحد يكون قريب لي ناس الوسط الاربعه الساكنين بين طماطاشرنا ودائرة السنتر
وواحد يكون واقف امام تلاته مدافعين
تجيهو الكوره طايشه ويتهبل وراها
اذا حصلها يتلفت يلقي نفسوا براهو
غريب وسط الاجانب
يحس كأنو البلد دي ماحقتو
ولا سوداني جواره مافي
طريقه عقيمه
تخلو من الجرأه في مهاجمة الخصم
وتعتمد علي الصدفه
والحماس
والجماهير
والجمهور زاتو بنوم بدري
عادتو كده
ياهجوم مطر من اول دقيقه
وهدف مبكر
ياينوم
وحتي لو جبت هدف مبكر ما تطول
بعد ربع ساعه لو ماجبت التاني الجمهوربفتح ليك
وحتي لو جبت التاني
الشوط التاني لازم التالت
او الجمهور يطلع يخليك براك ضد الاجانب
المهم
طريقة لعب الاولمبي الامس دي نفس طريقة لعب صقور الجديان الكبار
نفس الباميه
علي نفس الدرب
كلنا في الخلف
وواحد  او بالكتير اتنين قدام
يجروا خلف اي كورة طائشه زي كلاب الخواجات
طريقه غريبه
وعقيمه
وتوضح عدم الثقه في النفس وفي الامكانات
انا شخصيا بعد شفتها في الفريق الكبير والاولمبي
سميتها طريقة الاتحاد العام
يتخيل لي ناس الاتحاد العام بسلموا الاجهزه الفنيه الكشف والفنايل والكور والطريقه دي
اصحاب النعرات الهجوميه ناس جوجو والنعيم فرضت عليهم طريقة اللعب الجبانه الجلوس علي الكنبه
ولما فتروا ناس عنكبه
دخلوهم الميدان بعد ما قل تركيز عنكبه بالجري والنطيط خلف الكور الطائشه
بويا و الطاهر حكمت عليهما طريقة اللعب بالاعتقال مع اللاين  وجوار منير الخير حارس المرمي
وحرمت الفريق من طلعاتهما
الجهاز الفني اظنه نسي الاعداد النفسي
والدليل علي ذلك اضطراب الحارس منير الخير منذ الدقيقه الاولي وحتي الدقيقه سته وتسعين
يعني بين الشوطين لم يتم توجيهه
والمعروف ان منير من افضل الحراس بالممتاز
عنكبه كان يعنكب في اي كورة مشتركه
يفوز بها
وتجئ لمسة الختام من عنكبه لتهدر كل جهود عنكبه
الكلام ده من اول دقيقه ولي بعد بكره
لا شفنا توجيه لي عنكبه ولا شئ
برغم ان الكنبه مليانه زي كنبة المستشفي بي ناس الجهاز الفني
طبعا في ناس حايقولوا الاولمبي المصري قوي
ودليلهم علي ذلك انه هزم الهلال قريب ده بالمقبره
اتنييييييييييييين
والتالت الحكم ماحسبوا
وفي بلنتي اتقاضي عنها الحكم
يعني النتيجه مفروض تكون اربعه
لكن الناس ديل مايفوت عليهم شئ
نعم الاولمبي المصري هزم الهلال
لكن ياتو هلال ؟؟؟
هلال الحركه الوطنيه
ام هلال المؤتمر الوطني ؟؟؟
المصري هزم هلال الحركه الوطنيه
لكن بعد كشكوش الحكومه للهلال
وارتماء الهلال في احضان كشكوش الشعب
ترك الهلال الحركه بتاعت الحركه الوطنيه
واصبح هلال الحكومه
هلال المؤتمر
مؤتمر شنو كيف ؟؟؟
يعني مؤتمر الخريجين يا خالد عزالدين ؟؟؟؟؟
المهم
نزار حامد هو شغيل الاولمبي
عجبني شديد
يعفص ويداوي
الحكم اليوغندي
كان جارنا
واصبح جار جيرانا
لكن برغم البعد الجديد
مانسي الجيره القديمه
وكان رائعا
ياناس
قلتوا سفاري بحب يلعب جوار مساوي
سفاري جدد
ومساوي يرغب في اللعب جوار سفاري
يسويها الله
اتسفري
قال اجتماع اركويت قال
سلك كهربا
ننساك كيف ولسه بنلعب بي طريقة الاتحاد العام تسعه مع الحارس وواحد قدام يكوس رزقو ويكابس
والي لقاء
سلك