بسم الله الرحمن الرحيم
في السلك

babikir maki [عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.]
سمعتوا بكلمة هرطقه ؟؟؟؟
طيب سمعتوا بكلمة هضربه ؟؟؟؟
اها سمعتوا بي زول مامصدق ؟؟؟؟
اها الهرطقه هي هضربة زول مامصدق حدث معين
اخواننا الاهله من يوم كورة الاهلي
اهلي هنا
ما اهلي شندي
بهرطقوا
فجأه كده قالوا الممتاز سمح وجميل ورائع
وقبلها بيوم كان كعب ومادايرنوا
واستمرت الهرطقه
حتي الجمهور حضر مباراة جزيرة الفيل بعدديه اكبر من كل المباريات الخاصه بهم في الممتاز
الجمهور جا من بيتو يهرطق
ويهمهم
قال علامه كمله قال
ونسي ساكواها
ونسي اهلي شندي
شدت مابهرطق بهتف اهلي ...اهلي
اول من تقول ليهم شندي
يسكتوا
واستمرت الهرطقه لدي الكتاب
الرائع كبوتش هرطق جنس هرطقه
كتب
الشطب في الهلال محدود محدود لايتعدي الاثنين فقط رغم ان الفريق سيضم اربعه لكشوفاته في تسجيلات اول يونيو القادم
واضاف كبوتش
الهلال في حاجه ماسه لمدافع ليبرو وصانع العاب ماهر ولاعب وسط متقدم
عليكم الله شفتوا الهرطقه دي ؟؟؟؟
مره الشطب اتنين
ومره الهلال حايسجل اربعه
ومره الهلال محتاج حاجه ماسه لي تلاته
ومن شدة الهرطقه قال كبوتش انهم محتاجين لصانع العاب ماهر
صانع العابكم الفريد في عصرو قنعتوا منو ياكبوتش ؟؟؟؟
الهرطقه قادت ميشو ليحدثنا عن الوطنيه عبر صحيفة قون عدد الامس
ميشو يحدثنا عن الوطنيه
هانت والله
والوطنيه عند ميشو تحتم علي كل سوداني الوقوف خلف الهلال
ميشو شخصيا نحنا عارفين ليهو وطن عشان يكلمنا عن الوطنيه ؟؟؟
ياكافي البلا الاجازه بقضيها في اديس
او في  واحده من دول سيكافا
لاسمعنا بيهو مشي اهلو لي كريسماس
ولا لي راس سنه
والنسيم ده بشمو في اسمرا
قال وطن قال
ولا سمعنا بيهو مشي عرس بت اختا ليهو ونزل البلد
ولا لسداد مصاريف مدارس اولادو
ولا للعزاء في حبوبتو
ولا وداهو مرض ابوهو
وطن شنو الجاي تقول عليهو يا ميشو !!!!
ووطنية منو يا كوتش ؟؟؟؟
وزاد ميشو من هطرقته وقال انا افضل مدرب اجنبي يعمل بالسودان
ياميشو
دحين ماكترت المحلبيه!!!!!
مدرب اهلي شندي ده ود المك نمر ولا شنو ؟؟؟
وحسام البدري ظنيتك حاسبو من كريمي
شايقي ومشلخ لا ورا
ورمضان كان له نصيب من الهرطقه
قال المريخ فقد صدارة الهدافين لتصبح الآن بالاشتراك ؟؟؟؟
من وين فقدناها ومن وين مشتركين فيها ؟؟؟
هطرقوا ساااااي
وازيدك من الشعر بيت يارمضان
فيصل موسي برضو ولدكم
موش خزنتوهوا في اهلي الارباب الجاب العذاب ؟؟؟
الارباب برضو ولدكم يا رمضان
ولا اتبريتوا منو ؟؟؟؟
والرائع قسم خالد
زادنا من الهرطقه بيت
قال الفرق بين البطل والوصيف اصبح ثلاثه نقاط
اتوصفي
الحمد لله الاعترفتوا بانكم لسه وصيفنا
وبأننا البطل
دي فاتت عليك يا قسم
اما خالد عز الدين فكانت هرطقتو عينه
قال ايه
المعز افضل من الحضري
ماشي يا استاذ
ومالو
بس ماوريتنا افضل دي قاصد بيها شنو ؟
اذا كنت تعني افضل من ناحية رجل فاضل
في دي ماعندنا كلام
لكن اذا كنت تعني بها مفاضله بينهما من حيث المستوي الفني
فدي تبقي هرطقه في مرحله صعبه جدا وعلاجها مستحيل
الدكتور حايقول ليك معليش جيت متاخر
ياخالد
الالقاب الدوليه والبطولات القاريه التي حصل عليها الحضري عددها يفوق عدد حروف المعز ومعاهو حروف اسم عمك محجوب
المعز القابو الحصل عليها شنو ؟؟؟
ديدا ؟؟؟؟؟؟؟؟؟؟؟؟
هااااااااااااااااااااااااااااااااي
اتقوا الله ياناس
ايها الناس
كل هذه الهرطقه توضح انهم لم يتوقعوا مجرد التعادل امام المريخ
هرطاقاب واهليياب
ولا يوجد مريخي كان يتوقع مجرد التعادل
ولا هم مصدقين
ولا الواقع قادر علي استيعاب تلك الخساره
لذلك هطرقوا جميعا
فكونا من مدرب الاهلي شاطر
وفكونا من لاعبوا الاهلي ينفذون خطة المدرب باجاده
وفكونا من خطه دفاعيه محكمه
وفكونا من الاهلي عمل للفوز وكان له ما اراد
كلها عبارات لاتقنع حتي اصحابها
وفكونا برضو من حكاية تزمر وتمرد وتآمر
من يقول ذلك يريد فقط تعكير صفو المياه
ويجيب سنارتو
لانهم اناس اعتادوا علي (قبيض) السمك في الماء العكر
قراميط ساااااااااااااااااااااااااااااي
لكن تلقوها عند الغافل
آخر الاخبار
شمهروش داير يبيع المويه في حارة الشماهريش
وقال مسافر مع البعثه
وعلي حسابو
حتي يطمئن الشاري علي صدقه
وبعد تحقق المراد الحساب ولد
سنو هاج شمهروش
ان الله سيبطله
قبلك كان اشطر
دخل الكوره
خاتي الحمامه في الراس
ولما الخمسه جات
الحمامه شدت ما اندهشت هي زاتها راسها لفه

سلك كهربا
ننساك كيف والنفاثات لسه في العقد
والي لقاء
سلك