بسم الله الرحمن الرحيم
في السلك

•    غبنا  عن الكتابه بالامس لاننا كنا في وداع الراحل المقيم مولانا عزالدين الصبابي
•    كان رياضيا ناصع الدواخل فاتي لوداعه كل اهل الرياضه
•    كان قانونيا نزيها وعادلا فاتي اهل القانون من قضاة ومحامون وموظفون في الحقل القانوني
•    كان نقابيا اختصه الله لقضاء حوائج الناس فجاء جل اعضاء اتحاد المحامين
•    كان ود حله وعشا بايتات فاتي لوداعه كل ناس بحري وامدرمان والخرطوم
•    كان اخو اخوان فجاء كل المجتمع مودعا
•    انه رجل امه
•    امة كامله
•    نسأل الله له رحمة واسعه وان لا يفتننا من بعده وان يجعل البركه في ابنائه
•    اها
•    امس كانت اغرب كوره
•    مشيت لاستاد الخرطوم من امدرمان عن طريق شارع النيل
•    ولما وصلنا قبالة بوابة قاعة الصداقه اوقفنا رجال المرور
•    وقفنا طابور
•    يظهر في مسؤول قادم
•    ولاننا تعودنا ان نقيل في الشوارع نص اليوم داخل سياراتنا اذا كان هناك مسؤل قادم
•    نستناهوا لمن يصحي ويلبس ويشرب شاي الصباح ويتحرك ويصل الي مقصده حتي نتحرك
•    يخيل لي بتاع المرور الواقف جوار بيت المسؤل يتصل برجل المرور الواقف في الشارع الجاي بيهو المسؤل
•    يقول ليهو الو الو اربعه اربعه حول
•    التاني يقول اربعه اربعه معاك واضح
•    الاول يقول ليهو سعادتوا صحي من النوم  اقفل الشارع
•    ونقيف لما سعادتو يجي ويمشي
•    اتعودنا علي كده
•    وعودنا المسؤلين علي كده
•    نقيف ورانا شنو ؟؟؟؟؟
•    المهم لما وصلنا الاستاد كانت الدقيقه تلاتين
•    والاهلي جاب قونو
•    والشمات فرحانين
•    دخلنا الاستاد
•    عندي في العربيه كرسي بتطبق
•    خاتيهو في الضهريه
•    بمشي بيهو البحر
•    نزلتو معاي ودخلت الكوره
•    لانو كراسي استاد الخرطوم دي مامضمون
•    اول حاجه شويه
•    وتاني حاجه لدائن خفييييييييييييفه
•    يعني ممكن تقع بيك في اي لحظه
•    تالت حاجه قلت يا ولد لو بتاع الصيوانات البأجر الكراسي دي للاستاد الليله عندو بكي وحفلتين
•    وبالتالي ماجاب كراسي للكوره
•    نقعد في شباشبنا يعني
•    المهم اتصرفت وشلت معاي الكرسي
•    ودخلت الاستاد
•    الله يخلي لينا كراسي البحر
•    قلت اي كوره في استاد الخرطوم ده بجيب معاي كرسي البحر
•    لما المسؤل عن الكراسي يجيبها
•    لو كان ذلك المسؤل ناس الاتحاد العام او كان ناس اتحاد الخرطوم
•    او كان لجنة اعادة تأهيل الاستاد لبطولة الشان
•    المهم لما الزول المفروض يجيب الكراسي يجيبها
•    يكون الموسم انتهي
•    وبطولة الشان الجايه انتهت
•    المهم
•    ماحضرت القون في الاستاد
•    لكن حضرت القون في التسجيل
•    نفس الخطأ الذي احرز به النسور هدفه في شباكنا
•    مصيدة التسلل لا تعني الثبات في كل الحالات
•    ولكنها ايضا تعني الحركه مع اللاعب القادم من الخارج
•    شخصيا ماعارف الحكايه دي فايته علي البدري ولا فايته علي الدفاع
•    وفي الحالتين هناك استهتار من توت عنخ آمون حضري
•    المهم
•    الزعيم في مجمله لم يك سيئا
•    بل سيطر علي المباراه كامله
•    والاهلي انضبط تكتيكيا في الدفاع
•    ولم ينجح بقدر كبير
•    بدليل الكم الهائل من الاهداف الضائعه
•    الكوره دي ذكرتني كورتنا في ختام سيكافا
•    لكن بيني وبينكم الكوره دي ماكانت براها
•    والبعرفو انا الاهلي مابتاع نفاثات في العقد
•    ولا التكس الرواندي الحائز علي بطولة سيكافا بتاع نفاثات في العقد
•    ولكن يوجد من له مصلحه في خسارة المريخ لسيكافا
•    ومن له مصلحه كبيره ليفقد المريخ نقاط في الممتاز
•    شكيتكم علي الله
•    ان الله سيبطله
•    ايها الناس
•    بعض الجماهير تهمس تحت تحت
•    بقولوا في تآمر وتضامن
•    ولكني استبعد ذلك
•    معقوله ؟؟؟؟؟؟
•    البدري دعم الاهلي معنويا  بالتغييرات التي اجراها باكرا
•    فاعتقد الاهلي بانه استعصي علي المريخ
•    الامر الذي ثبته في الملعب داخل خط سته
•    واعتقد ان البدري اخطأ في اخراج راجي صاحب الحلول الفرديه مع العلم بان الاهلي كان متكتلا بالكامل
•    كمية الاهداف الضائعه في هذه المباراه اكتر بكتير من التي احرزناها في اي مباراه
•    ولكنها قالت كده
•    ايها الناس
•    يوجد تهاون شديد في منطقتنا الدفاعيه
•    اظنه احد مظاهر الغرور
•    ولعلنا نستفيد من مباراة اليوم في علاج  ذلك التراخي
•    المهم
•    من امس طبعا الممتاز اصبح قوي ومفيد ومهم في نظر ناس خالد عزالدين
•    لكن قريبا سيعودون الي عدم اهتمامهم بالممتاز
•    ويرددون انهم يهتمون فقط بالبطولة الافريقيه
•    وقطعا سينطبق المثل
•    لا طلت بلح الشام ولا عنب اليمن
•    ايها الناس
•    يجب ان نتعامل من الهزيمه بواقعيه
•    ونستفيد من الاخطاء
•    ونعتبرها ثلاثه نقاط زكاة الزعيم للدوري كلو
•    ازيد من ربع العشر بقليل
•    زكاه وصدقه
•    ايها الناس
•    بصراحه
•    قلق كان في الواطه دي
•    عدم تركيز واضح اثر علي البقيه
•    نجم الدين يفلق ويداوي
•    مبروك للاهلي والهلال ولجنة التحكيم المركزيه
•    وهارد لك للزعيم
•    التحيه للمريخاب الحمر الذين صفقوا للمريخ بعد المباراه
•    وهتفوا
•    مريخ ......مريخ ......مريخ
•    هذا هو الانتماء الحقيقي والروح الرياضية المتأصله
•    وللذين فقدوا البوصله عدم الرجوع لما اتوهوا من تشنج اثناء المباراه ساعد في عدم التركيز
•    المهم
•    اليوم شباب من اجل المريخ يقدمون الدعوه للعضويه
•    بدري
•    من المغرب
•    ابقي مريخابي ما تبقي مشجع سااااااي
•    يا قسم وخالد وعبدالماجد وابو كريق  والرشيد
•    الممتاز كيف ؟؟؟؟
•    بقي كويس ؟؟؟؟؟؟؟؟؟
•    طلع من الزيتونه؟؟
•    حمدالله علي السلامه
•    احر التعازي للاخ سامر العمرابي في وفاة والده
•    ذلك الاعلامي الرائع والضخم
•    نسألأ الله له الرحمه
•    ملحوظه
•    الداير يتفرج في كورة امس دي يفتح قووون
•    في اي زمان واي مكان
•    من الليله والي نهاية الموسم
•    اكتر كوره حاتتعاد
سلك كهربا
ننساك كيف واقوان مطر بتضيع يافرده ؟؟؟؟؟؟
والي لقاء
سلك