بسم الله الرحمن الرحيم
في السلك

•    كما توقعنا
•    بدل من ان يشجبوا التصرفات الرعناء التي بدرت من منسوبيهم كسروا عنق الحقيقه
•    كشششششششششششششششش
•    كسروا عنق الحقيقه واتوا بمبررات واهيه
•    بل حملوا جمهور المريخ المسئوليه
•    ياناس بلاش تهريج
•    ومن يجد مبررا لمافعله الذين جدعوا من خارج الاستاد الي داخل الاستاد
•    يبقي ماعندو فرق من الذين جدعوا
•    ايها الناس
•    اننا ننتظر اللجان البتحقق
•    عشان تحسم شراره لاتقود الا الي الهلاك
•    تقود الناس لردة الفعل
•    وعندها لاينفع علاج
•    ويختلط حابل الفلس بنابل العز
•    ولحظتها تبقي جاطت
•    دعونا من الكيل بمكيالين
•    دعونا من دفن الرؤوس تحت الرمال
•    دعونا من ايجاد مبررات واهيه
•    الناس تقتنع بان السن بالسن
•    ولكن السن ممكن تبقي بالف سن
•    اذا كانت الحكايه حقاره
•    واذا كان في هذا البلد ناس يستثنوا من الوضع تحت طائلة المسائله للمجامله
•    تبقي اي ردة فعل متوقعه ونجد لها العذر
•    العين الحمراء وحدها التي تأدب من يخرج عن نطاق الادب
•    وتعيده الي وعيه
•    والعين الحمراء الآن عند اصحاب القرار
•    نرجوا ان لاتنقلب عينا زرقاء
•    تجد العذر عند الفعل
•    وتكشر لردة الفعل
•    منتهي الفوضي
•    ومنتهي عدم المبالاه
•    ومنتهي عدم الاحترام لاي شئ واي شخص
•    واستحقار لسماحة مجتمع الرياضه
•    الموضوع ده يجب ان لا يمر مرور الكرام يا ساده يا كرام
•    المهم
•    نعود للمباراه
•    مافي شئ جميل كان في المباراه
•    لم نجد طريقه لعب واضحه
•    ولا خطه
•    زمااان لما كنا صغار وبنلعب كوره في الحله
•    كنا بنعمل خطه برانا
•    مثلا نقول لي زيد لما الكوره تجي لي عبيد انت اجري في الفاضي
•    في محل الجناح اليمين
•    يقوموا ناس الدفاع كلهم يجروا معاك لي محل الجناح اليمين
•    يقوم زيد يلعب الكوره محل الجناح الشمال
•    ويظهر عمر الذي يجد نفسه وحيدا ويودعها المرمي المحدد سلفا بحجرين
•    خطه زي دي ماشفناها يا البدري
•    ولو اديتهم ليها ماممكن تتنفذ طالما انت تعتمد علي الباشا في صناعة اللعب تارة والارتكاز تارة اخري
•    الباشا يا ساده فقد ثلث الكرات التي تسلمها
•    ومرر ثلثيها خطأ
•    لم نجد وسطا يا سيادة البدري يصنع لعبا
•    بدليل ان المباراه كلها فيها تمريره واحده
•    من العجب
•    لي الباشا
•    ومنه لحارس المرمي الذي صداها
•    برغم ان الباشا كان في وضع انفراد تام
•    نجم الدين مازال يلعب لعب الحواري
•    عاصم عابدين ادي اسوأ شوط اول في تاريخ المريخ
•    لم يدافع
•    ولم يفيد الهجوم
•    كان يهدف في الشوط الاول من جمب البدري
•    والتهديف من مسافه كهذه يدل علي تشتت الذهن
•    اما في الشوط الثاني فقام ببعض المحاولات الهجوميه
•    ولكن لم يتحسن وضعه الدفاعي
•    الشغيل اعطاني احساس بانه لا يدري ان هناك مباراه لكرة القدم شغاله وهو مشارك فيها
•    سارح وتائه
•    سفاري
•    اخرج كره في الشوط الاول
•    مشت عاليه
•    تابعها
•    ولكنه اراد استعمال قدمه لابعادها مره ثانيه
•    وهي عاليه
•    لم تنزل لمستوي القدم لسه
•    معقوله ياسفاري المهاجم الكان معاك يرجاها لما تنزل الارض
•    التصرف الطبيعي هو التعامل معها بالرأس
•    سيما وسفاري قادم ناحيتها مندفعا
•    الامر الذي يساعده علي القفز
•    خطأ لايشبه خبراتك يا كابتن
•    العجب
•    الحاصل شنو يا زول ؟
•    علي العموم المحصله اداء ردئ جدا
•    وحتي الاحساس والغيره صفر
•    كاننا قادمون من التتويج بكأس افريقيا
•    لم نجد جديه الا عند باسكال ( كالعاده )
•    والحضري ( الواجع الناس )
•    ومصعب (مره مره )
•    اما هنو
•    فاري انه ادي دوره كاملا
•    حماسا واصرارا وتهديفا
•    شغل دفاع المورده بشده
•    هنو مكسب
•    صدقوني
•    اييها الناس
•    ماتتغشوا
•    الجماهير لم ترض عنكم
•    ادائكم غير مقنع
•    وبارد
•    ولم يغير في فكرة الجماهير نحوكم
•    لا للتطبيب
•    لا للمجامله
•    لا لادعاء النسيان والتناسي
•    ولكن الجماهير لن تقاطع مريخها الذي تعشق
•    ايها الناس
•    نحن في انتظار قرار الناس حول ماحدث من فعل مشين
•    ما بننسي
•    المهم
•    زمان لو لقيت ليك شافع بجدع بتقول ليهو بتطقع مالك !!!جنيت
•    اسي اي شئ اتغير
•    اذا لقيت زول بطقع تقول ليهو بتطقع مالك !!! فلست ؟
•    شباب المنتديات
•    عفارم عليكم
•    امشوا لي قدام شديد وسريع في موضوع العضويه ده
•    انه العلاج الوحيد والناجع لكثير من العلات في مريخنا
•    من هنا ولي قدام
•    مافي عمال مصنع بحددوا لينا مجلس ادارتنا
•    مجلس ادارتنا بكامل ارادتنا
•    ايها المريخي
•    عضويتك امانه في رقبتك
•    استخرجها حتي تكون كلمتك مسموعه ومؤثره في مريخك
•    عضويه ميه ميه بتجيب مليون جويه
سلك كهربا
       ننسي كيف بس يا زول !
والي لقاء
سلك
babikir maki [عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.]