بسم الله الرحمن الرحيم
في السلك

•    سمعت امس لقاء اجراه الاستاذ عبده قابل مع عاطف القوز وعصام الدحيش
•    كان لقاء جميلا
•    فتوهوا فت شديد
•    بدون تحفظات
•    وتحدثوا عن علة المريخ واسباب خروجه
•    اديكم بعض من عباراتهما
•    عاطف قال
•    لما نتعادل يومين ما بنتكلم
•    لاعبوا اليوم اشك في انهم مريخاب
•    كنا بنحب بعض لدرجة وصلت هذه المحبه للاسر
•    قلنا كأس مانديلا لازم يجي لو نموت
•    مادام مافي روح ومافي  حب يبقي لازم يكون في استهتار
•    نحنا اثناء المباراه كنا بنتذكر جمهور المريخ الترك اولادو واكلو وشرابو وحضر للاستاد بدري
•    لو الغيره بتتباع في البقالات كان اشتريناها للاعبي المريخ ديل
•    كنت بتمرن براي علي الضربات الثابته
•    بجي التمرين قبل اللاعبين واتمرن عليها
•    عبده قابل سأل عاطف عن قصة هدفه في الهلال الذي نقضه عثمان احمد البشير
•    عاطف قال الحكم احتسب الهدف ورجع نقضوا
•    ولما سألتوا لماذا نقض الهدف قال لي انتوا دايرين تغلبوا كم اصلوا ؟ كفاكم الاتنين دي , وبعدين اسي البمبان بقوم
•    لاتعليق علي بمبان اقصد كلام الحكم
•    واليكم برضو بعض من حديث الدحيش
•    الدحيش قال
•    مريخ اليوم فقد اهم حاجه وهي الروح
•    زمان شعارنا يانموت يانحيا منتصرين
•    كنا لاعبين ضد المريخ ايام كنت في اهلي مدني
•    ونحنا داخل الملعب المرحوم سامي قال لي انت الليله تمشي معانا الخرطوم عشان نسجلك
•    ( لاحظوا دور الكابتن )
•    ايها الناس
•    شوفوا كلام عاطف والدحيش
•    قارنوها مع الكلام الجواكم
•    واستصحبوا معكم مايحدث الآن
•    اكيد بعد كده حاتعرفوا السبب
•    واذا عرف السبب بطل العجب
•    افتقدنا ايداهور
•    ليس لانه ابن عمنا
•    ولا لانه رئيسنا في العمل
•    ولكن لانه غيور
•    وتبقي كارثه لو كان ايداهور هو آخر معاقل الغيره لدينا
•    ايها الناس
•    كلنا يعلم اسباب موت الغيره
•    منذ ثماني سنوات يقبعون في خاناتهم
•    ونشطب الجدد
•    ونسجل غيرهم
•    ونعيد شطب من سجلنا حتي قبل ان يأخذ فرصته كامله
•    ونبقي علي بواطن البرود والشرود والاستهتار
•    موسي الزومه اتي الينا يفيض غيرة وحيويه
•    عاشر من وجدهم قبله
•    تأثر بهم
•    واصبح واحدا منهم
•    العلاج الجذري يكمن في عجاج كرعينهم
•    والي ذلك الحين يوجد علاج موضعي
•    الكنبه يا حبه
•    الكنبه تشيل جمل
•    وعلي البدري ان يعطي الفرصه للذي يستحقها
•    ويدعمهم بالاشبال
•    عسي حواء المريخ تكون قد ولدت من بينهم من يستطيع ان يقود المريخ بقلب تلهلبه الغيره
•    ويعود الينا مريخنا الذي عشقناه غيورا مسؤلا لا يقبل بالانكسارات
•    تهزه الهزائم لانها لاتشبهه
•    يابدري
•    الناس الاخدت فرصه بالسنين اختاهم لينا
•    ووسع الكنبه ياجدع
•    املاها من اناس كانوا لايتوقعون جلوسهم عليها
•    اجلسهم عليها
•    عشان يعرفوا حاجه
•    ويعرفوا ان المريخ مافاضي لاستهتاراتهم به
•    ويعرفوا قيمة جمهور المريخ
•    ويعرفوا انهم فوتوا علي انفسهم فرصه لاتعوض
•    ويعرفوا انهم للتشكيلة ماراجعين بحول الله
•    المهم
•    هلالابي دخل كافتريا
•    قال لبتاع الكافتيريا عندكم شنو ؟
•    بتاع الكافتيريا قال ليهو عندنا ملك شيك
•    صاحبنا صرخ شيك ؟ شيك شنو ؟
•    والجريه الياها
•    بالمناسبه
•    القال ليكم منو الهلال تعادل واحد واحد في انجولا !
•    في زول شافها ؟
•    يمكن تلاته صفر وصعدوا بضربات الجزاء
•    يمكن اتنين صفر وصعدوا بفارق هدف
•    يمكن الفريق التاني ماجا كلو كلو
•    يمكن تلاته واحد
•    ما اظن في زول بقدر يجزم
•    كوره لافي زول شافها
•    ولا في زول سمعها
•    ولا في زول ضرب ليهو زول من محل الكوره تلفون
•    العلم علم الله
•    زمااااااااان في ناس اتغلبوا اربعه صفر
•    بره الكلام ده
•    لما جوا راجعين في الطياره حلفوهم المصحف يقولوا الكوره اتنين
•    وقالوها
•    وصدقناهم
•    لانو الكوره لافي زول شافها ولا في زول سمعها ولا في زول مسكل لينا ساي من هناك
سلك كهربا
           لسه بدري عشان ننسي
والي لقاء
سلك


babikir maki [عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.]