* مشينا المطار صالة كبار الزوار

* صالة يجوا بيها الأبطال.

* طبعاً الأبطال ديل بلعبوا في دوري الأبطال.

* ومجرد اللعب في دوري الأبطال لا يعطيك وصف بطل.

* في ناس ما أبطال ويلعبوا في دوري الأبطال.

* الاتحاد الأفريقي حقو يسمي المنافسة دوري الأبطال ووصفاء الأبطال.

* المهم في المطار اتذكرت لما جينا نستقبل عمك عبد الباقي.

* عمك راجل جارنا وكان اجتماعي ولسانو طويل خلاص.

* عمك شعر بورم في الفشفاش، وفوران في دم الراس ورطوبة في الركب.

* كان لما يجي يمشي يقع بدون سبب.

* مرق بس.

* المهم حالتو تدهورت لدرجة فظيعة.

* أصبح عايش بمساعدة الحكام.

* والحكام هم جمع حكيم.. وهو الطبيب.

* آخر شيء ناس الحلة عملوا كشف. وسفروه بره للعلاج.

* السفرة الياها.

* لا تدري نفسٌ بأي أرضٍ تموت.

* وجانا الخبر شايلو النعيم.

* النعيم ده ود عمك عبد الباقي الصغير.

* ناس بلاد بره قالوا ما يسلموا الجثمان إلا يعرفوا سبب الوفاة.

* ودخلوه المشرحة.

* اكتشفوا ضعف شديد في الجانب الشمال.. والقلب شاخ.

* وركبة الجانب اليمين منتهية.

* وفي النص محل المصارين لقوا تداخل بين صمام كبير اخوانو وباقي أعوانو.

* وظهرت في الكبد مساوئ.

* الكُلى لا بتودي ولا بتجيب.

* الضغط ينزل.. النفس ما ينزل معاهو.

* دكاترة بلاد برة قالوا دي أمراض خطيرة.. الزول ده كان عايش كيف؟

* قلنا ليهم مرة عايش على كيفو ومرة يقسم حاجاتو يقول داير أموت ومرات يبقى رشيد ومرات يحوم فيهو النمل ومرات يشعر بسكرات الموت يسمع لإبراهيم عوض ويكضم.

* اليوم اليسمع فيهو إبراهيم عوض يدخل في غيبوبة.

* مرات يهضرب يقول أنا اب كريق.. أنا الصعب.

* ومرات يهترش وينخر ويهمشر..

* دي كانت حياتو.

* قالوا خلاص تدفنوه.

* الجماعة المرافقين قالوا والله ما يندفن هنا.

* يندفن بره بلدو ليه.. كيبل!

* السفارة تدخلت وعملت الإجراءات وركبوه الطيارة في صندوق.

* كلنا مشينا المطار نستقبل الجثمان.

* ولما الجثمان وصل قالوا لينا ممنوع يمشي الى محل.

* من هنا وللمقابر عدل.

* شوف المقابر دي.

* وتقول لي الجماعة يلعبوا في استادكم؟

* الصفوة رفضوا كل الوساطات.

* قال لي انتو قبل كدةه ما لعبتوا في استادنا.

* قلت ليهو استادكم كان فيهو شنو يتكسر وخايفين عليهو؟

* قالوا اللاعبين هم الذين طالبوا باللعب في استاد المريخ.

* يا اخوانا ما تتسرعوا ساي يمكن اللاعبين ديل طلبوا يلعبوا في المريخ والجماعة خجلوا وقالوا استاد المريخ.

* استاد تم نهي قشرات على حسابنا.

* كون نفسك واعمل ليك كيس.

* دار الرياضة أمدرمان أنسب مكان.

* ضل الدليب أروع سكن.

* صدقوني.

* في روليت بطولة الأندية الى الآن الزعيم الأول.. ثلاث نقاط وهدف نضيف خارج الأرض، الأهلي والنيجيري وزيسكو وباقي الهتش نقطة واحدة.

* وفي ناس بدون نقاط وعليهم هدف بالكثير هدفين.

* الزول الماعندو نقطة وعليهو ثلاثة أهداف ده قفل النمرة سطاشر من سطاشر.

* يعني عند الله بعيش.

* انتو ما تلعبوا في استاد البرنس الجديد.

* كل زويل يشيل استادو

* لكم خرابتكم ولنا قلعتنا.

* وما بنديكم استادنا .. وما دايرين معاكم.

سلك كهرباء

يا وطني... مبروك عليك

أوكامبو الماسورة

سلك